Քաղաքապետ․ Տրանսպորտից քիչ օգտվողների համար ուղեվարձը կարող է ավելի թանկ լինել

PanARMENIAN.Net - Երևանի քաղաքապետ Տիգրան Ավինյանը հայտարարել է, որ հանրային տրանսպորտի միասնական տոմսային համակարգը կներդրվի 2025-ի հունվարի 1-ից։

«Տրանսպորտի վճարման նոր համակարգին ամբողջական անցումը տեղի է ունենալու հունվարի 1-ից։ Մենք նոր տոմսային համակարգի ներդրման փորձարկման փուլում ենք»,- ասել է նա։

Անդրադառնալով ուղեվարձի թանկացմանը՝ Ավինյանն ասել է, որ տրանսպորտից ավելի քիչ օգտվողների համար այն կարող է ավելի թանկ լինել, գրում է Panorama.am-ը։

«Համակարգն ամբողջապես նոր տրամաբանություն ունի և այն մարդիկ, որոնք ավելի շատ են օգտվում տրանսպորտից՝ նրանց համար միգուցե ավելի էժան լինի ուղեվարձը, իսկ այն մարդիկ, որոնք ավելի նվազ քանակությամբ են օգտվում տրանսպորտից, ապա նրանց համար կարող է մի փոքր ավելի թանկ լինել։ Տրանսպորտային համակարգի և մարդկանց հարմարավետության համար միասնական տոմսային համակարգն էական բարեփոխում է լինելու»,–ասել է նա։

Քաղաքապետը նշել է, որ այս փուլում տոմսային համակարգի խնդիրներ են վերհանում և փորձում լուծել։

Ավինյանի խոսքով, մինչ այդ քաղաքացիները հնարավորություն կունենան տերմինալների միջոցով, ինչպես նաև բանկային քարտի միջոցով NFC կիրառմամբ այդ տոմսը գնելու, նաև քարտային ապարատները կպատրաստվեն։

«Մենք ուզում ենք, որ այս համակարգն ամբոջապես պատրաստ լինի, որպեսզի համոզված լինենք, որ այն աշխատում է, բոլոր խնդիրները լուծված են, և հունվարի 1-ից նոր համակարգն արդեն իսկ ներդրվում է»,-հայտարարել է Ավինյանը։

Ավելի վաղ հայտնի դարձավ, որ Երևանի հանրային տրանսպորտը սպասարկող մոտ 660 շարժակազմում արդեն տեղադրվել են միասնական տոմսային համակարգի հատուկ սարքեր: Նախագծի ներդրման հաջորդ փուլը Երևանի մետրոպոլիտենում է. քաղաքացիներն այստեղ ևս ժետոնների փոխարեն արդեն իսկ կարող են վճարել QR code-ով: