Հայաստանում կստեղծվի 4 նոր պատմամշակութային արգելոց

29 օգոստոսի 2024 - 15:03 AMT

PanARMENIAN.Net - Հայաստանում կստեղծվեն «Երերույք», «Հին Խնձորեսկ», «Բերդկունք ամրոց» և «Նորատուսի խաչքարեր» պատմամշակութային արգելոցները: Համապատասխան նախագիծը հավանություն է ստացել Կառավարության օգոստոսի 29-ի նիստում։

Կրթության, գիտության, մշակույթի և սպորտի նախարար Ժաննա Անդրեասյանն ընդգծել է, որ մշակութային ժառանգության և զբոսաշրջային ներուժի տեսանկյունից հանդիսանալով բավականին մեծ պոտենցիալ ունեցող պետություն, Հայաստանը շարունակում է պատմական, գիտական, գեղարվեստական, ազգագրական արժեք ներկայացնող և զբոսաշրջային գրավչություն ունեցող հուշարձանների տարածքները դարձնել պատմամշակութային արգելոցներ, հայտնում է Արմենպրեսը:

«Նախագծով առաջարկվում է ստեղծել «Երերույք», «Հին Խնձորեսկ», «Բերդկունք ամրոց» և «Նորատուսի խաչքարեր» պատմամշակութային արգելոցները: Ներկայումս այս հուշարձանների տարածքում բացակայում են անհրաժեշտ ենթակառուցվածքները: Շատերը չեն այցելում այդ վայրեր նաև այն պատճառով, որ տեղի մասին որևէ ինֆորմացիա չունեն»,–ասել է Անդրեասյանը:

Նախարարը տեղեկացրել է, որ արգելոցների ստեղծմամբ հնարավորություն կլինի ստեղծել ենթակառուցվածքներ, բարեկարգել տարածքները, տեղադրել տոմսային տնտեսություն, որը լրացուցիչ հարկային եկամուտներ կապահովի պետական բյուջեի համար, տարածքում կգործի մշտական պահակակետ, կլինի անվտանգության ապահովման համակարգ, կանցկացվի լուսավորություն, կգործեն նաև էքսկուրսավարի և գիտաշխատողի ծառայություններ՝ բովանդակային միջավայրն ապահովելու համար:

Նախարարի խոսքով՝ արգելոցների ստեղծման արդյունքում շրջակա բնակավայրերի բնակիչները կստանան նաև տնտեսական գործունության նոր միջավայրեր՝ իրացնելու իրենց արտադրանքը, մասնակցելու այդ արգելոցների շրջանակներում զբոսաշրջային ուղիների կազմակերպմանը:

Վարչապետ Նիկոլ Փաշինյանն ընդգծել է, որ Հայաստանում կան բազմաթիվ պատմամշակութային հուշարձաններ, որոնք պատմական ժառանգության, հայերի ինքնության կարևորագույն մասն են:

Փաշինյանը նաև նշել է, որ հանձնարարական է տվել աշխատել Լեզվի տեսչության հետ՝ արգելոց բառն այլ բառով փոխարինելու համար:

«Մենք հիմա արգելոց ենք ստեղծում, բայց պետք է փոխենք: Դա արգելոց չի լինելու, ընդհակառակը՝ մարդկանց գնալու տեղ է լինելու: Զուտ մարքետինգային առումով «հրավիրել արգելոց» արտահայտությունից դիսոնանս է առաջանում: Կարծում եմ՝ այդ հարցը պետք է լուծել»,–հավելել է նա:

Փաշինյանը շեշտել է, որ արժեքների նկատմամբ վերաբերմունք պետք է ձևավորվի, պետք է այնտեղ եկամուտներ գեներացվեն, որոնք առաջին հերթին կուղղվեն այդ հուշարձանների պահպանմանն ու զարգացմանը: