Համասյանին տեղափոխող մեքենայի և «Հող և ջուր» միջոցառման անդամների վրա հարձակման փաստով քրվարույթ կա

PanARMENIAN.Net - «Հող և ջուր»-2 միջոցառման կազմակերպչական խորհուրդը հայտարարություն է տարածել համերգային խմբի և հայտնի երաժիշտ Տիգրան Համասյանի վրա հարձակման վերաբերյալ, որի ժամանակ քարերով հարվածել են Համասյանին տեղափոխող մեքենային, կոտրել ապակին։

Դեպքով նախաձեռնվել է քրեական վարույթ։ Այդ մասին հայտնել է ՀՀ քննչական կոմիտեն, տեղեկացնում է Sputnik Արմենիան։

«Նախաձեռնվել է քրեական վարույթ «խուլիգանություն» հոդվածով, հայտնի է, որ մեքենաներից մեկը վնասվել է, տուժածների մասին տեղեկություններ այս պահին չկան։ Քննիչներն այժմ աշխատում են միջադեպի մասնակից 3 անձանց հետ, ովքեր ենթադրաբար իրականացրել են հարձակումը»,–հայտնել են Քննչական կոմիտեից։

«Հող և ջուր»-2 մշակութային միջոցառման նախաձեռնող խումբը օգոստոսի 29-ին նախատեսել էր համերգ-նկարահանում դաշտային պայմաններում՝ Արագածի լանջին:

Ավելի վաղ «Հող և ջուր»-2 միջոցառման կազմակերպիչները հայտարարել էին, որ օգոստոսի 29-ին Արագածի լանջին իրենց համերգ-նկարահանման ժամանակ 3 անձ պարբերաբար իրենց խանգարել են, հանդիսատեսից մի քանիսը նշված անձանց կարգի է հրավիրել, որից հետո այդ 3 անձինք հեռացել են։

Համերգի տեսագրման ավարտից հետո նրանք վերադարձել են և 3 ավտոմեքենայով, փակել 10 ավտոմեքենայից կազմված շարասյան ճանապարհը Գեղաձոր գյուղի մոտ:

Նշված անձինք հարձակվել են առաջին մի քանի ավտոմեքենայի վրա, կոտրել մեքենաներից մեկի ապակին, որում Համասյանն է եղել, հարվածներ հասցրել մյուս մեքենայի վարորդին։

Ոստիկանությանը հանցագործության մասին հաղորդում էր տրվել: