«Ռոսատոմը» սկսել է ուսումնասիրել հայկական ԱԷԿ–ի ռադիոակտիվ թափոնների պահեստարանը՝ աշխատանքները կատարվում են կայանի 2–րդ էներգաբլոկի շահագործման ժամկետի երկարաձգման շրջանակում։

Ուսումնասիրությունն իրականացնում են «Ռոսատոմ Սերվիսի» և «Ուրանագրաֆիտային միջուկային ռեակտորների շահագործումից հանման փորձարարական–ցուցադրական կենտրոնը»։ Նպատակն է՝ գնահատել ռադիոակտիվ թափոնների անվտանգ և հուսալի պահպանման հնարավորությունը ՀԱԷԿ–ի հարթակում՝ շահագործման ժամկետները մինչև 2036 թ. երկարաձգման շրջանակում, հայտնում է Atommedia.online-ը։

«Ռոսատոմ սերվիսը» սկսել է Հայկական ԱԷԿ–ի շենքերի և շինությունների համալիրի հետազոտությունը: Ծրագրի շրջանակում առաջնահերթ կհետազոտվի թույլ ակտիվության կոշտ թափոնների պահեստարանը, որը գտնվում է կայանի հարթակում։ Պահեստարանը պարունակում է ռադիոակտիվ կոշտ թափոններ, որոնք առաջանում են ԱԷԿ–ի շահագործման ընթացքում և կուտակվել են 1980 թվականին կայանը շահագործման հանձնելուց ի վեր»,– ասված է հաղորդագրության մեջ:

Աշխատանքների արդյունքում համապատասխան եզրակացություն կտրվի պահեստարանի հետագա շահագործման հնարավորությունների և ժամկետների մասին։

Ավելի վաղ հայտնի դարձավ, որ Հայաստանի ատոմակայանի երկրորդ էներգաբլոկի շահագործման ժամկետի երկարացման նպատակով կառավարությունը 65 մլն դոլարի պայմանագիր կկնքի ռուսական «Ռոսատոմ» ընկերության հետ։ Ակնկալվում է, որ Հայկական ԱԷԿ-ի 2-րդ էներգաբլոկը հնարավոր կլինի անվտանգ շահագործել մինչև 2036 թվականը։

Հայաստանը դեռևս 2000-ականների սկզբին է հայտարարել նոր ատոմակայան կառուցելու մտադրության մասին, որի համար կպահանջվի ավելի քան 5 մլրդ դոլար։