Ֆինանսների նախարար Վահե Հովհաննիսյանն ԱԺ եվրոպական ինտեգրման ու ֆինանսավարկային և բյուջետային հարցերի մշտական հանձնաժողովների համատեղ նիստում ասել է, որ քննարկումներ են ընթանում ԵՄ-ի հետ և, հնարավոր է, 2025-ին ստանալ 25 մլն եվրո բյուջետային աջակցություն:

Նա տեղեկացրել է նաև, որ բացի այդ 2025 թվականի բյուջեի նախագծով Եվրամիության հետ նախատեսված է իրականացնել 2 դրամաշնորհային ծրագիր՝ 13․8 մլն եվրո գումարով. առաջինն «Աջակցություն Հայաստանում դատական ոլորտի բարեփոխումների իրականացմանը» (երկրորդ փուլ), որի գումարը կազմում է 4․5 եվրո և «Հայաստանում ԵՄ աջակցությունը կրթությանը» 9․3 մլն եվրո գումարով:

Նախարարը տեղեկացրել է, որ եվրոպական կառույցների հետ իրականացվում են մի շարք վարկային ծրագրեր, որոնք Տարածքային կառավարման և ենթակառուցվածքների նախարարության բյուջեում նախատեսված են 18․5 մլրդ դրամի չափով:

Վահե Հովհաննիսյանը ներկայացրել է պարզաբանումներ «Հյուսիս-հարավ» ճանապարհային հատվածին վերաբերող ծրագրի իրականացման, մի շարք կառույցներից, բանկերից ու ծրագրերից նախատեսվող հատկացումների վերաբերյալ:

«Վերջին տարիներին կտրուկ մեծացել է միջազգային համագործակցության ընդհանուր պորտֆելը, և աշխատանքներ պետք է իրականացվեն կարողությունների, ներուժի զարգացման ուղղությամբ»,- նշել է նախարարը: