ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը ֆեյսբուքյան իր էջում անդրադարձել է վարչապետ Նիկոլ Փաշինյանի ԼՂ հարցով բանավեճի հրավերին և դրան հաջորդած նախկին նախագահների մերժմանը։
«Հետևում եմ ՀՀ վարչապետի` բանավեճի հրավերին հետևող, 30 տարի ԼՂ-ն Ադրբեջանի կազմ վերադարձնելու մասին բանակցած 3 նախկին նախագահների ներկայացուցիչների արձագանքներին ու փորձում վերլուծել, թե ինչո՞ւ են այսչափ վախեցած ուղիղ եթերում բանավեճից կամ ինչո՞ւ իրենց դեմքով չեն հաղորդակցվում ժողովրդի հետ, այլ անմիտ գրառումներ ու հայտարարություններ են տարածում։
Հետո հիշեցի՝ ախր մեկիդ չեն թողել խոսի, մյուսիդ ասել են՝ ինչ խոսի, էն մյուսն էլ ընդհանրապես հայերեն հազիվ է խոսում»,–ասվում է գրառման մեջ։
Վարչապետ Նիկոլ Փաշինյանը բանավեճի էր հրավիրել նախկին նախագահներին ԼՂ բանակցային գործընթացի վերաբերյալ, որը Լևեն Տեր–Պետրոսյանը, Ռոբերտ Քոչարյանը և Սերժ Սարգսյանը մերժել են իրենց ներկայացուցիչների միջոցով։ Փաշինյանը ֆեյսբուքյան եթերում կրկին անդրադարձել է հարցին և կրկնել իր հրավերը։
Փաշինյանը ֆեյսբուքյան իր էջում գրել էր, որ 1994 թվականի հրադադարից հետո բանակցային գործընթացը եղել է Լեռնային Ղարաբաղն Ադրբեջանի կազմ վերադարձնելու մասին։
