Երևանի փոխքաղաքապետ Սուրեն Գրիգորյանը, անդրադառնալով ուղևորատոմսերի QR կոդերի վավերականության ժամկետի կրճատման հնարավոր վերանայման հարցին, ասել է, որ դա իմաստ չունի, քանի որ փետրվարի 1–ից 100 դրամներ էլ չեն լինելու:

«100 դրամը փետրվարի 1-ից էլ չի լինելու, ինչո՞ւ ժամկետը երկարացնենք», –ասել է նա, հայտնում է «Առավոտը»։

Անդրադառնալով QR կոդերի վավերականության ժամկետի կրճատման մասին լայն իրազեկում չապահովելուն, ինչի արդյունքում ՀՀ քաղաքացիներին մեծ անհարմարություններ պատճառվեց՝ Գրիգորյանն ասել է, որ Ավագանու ոչ բոլոր որոշումների մասով է ինչ-որ հաղորդագրություն լինում։

«Բայց ձեզ չի խանգարում, որ որոշումներ լուսաբանեք: Երևանի քաղաքապետարանի կայքում, եթե ինչ-որ բան հրապարակվում է, դժվար է դրանից հետո պնդել, որ այդ տեղեկատվությունը չի հրապարակվել: Կա պաշտոնական խողովակ, դուք էլ գործի բերումով պարտավոր եք հետևել ու այդ պարտականության շրջանակում նաև լուսաբանում իրականացնեք»,–ասել է նա։

Նրա համոզմամբ՝ բովանդակային առումով մեկանգամյա տոմսերը հիմնականում սպառվում են ձեռքբերելուց հետո հենց երեք օրյա ժամկետում և ամենևին չի ենթադրվում, որ դրանք երկարաժամկետ լինեն։

«Նաև այդ խոսակցությունները, թե «ինադու» են կրճատել, որ այդ գումարները գնան Թելսելին, ժողովո՛ւրդ ջան, տոմսերի բոլոր գումարները գալիս են Երևանի քաղաքապետարանին»,–ասել է Գրիգորյանը։

Ավելի վաղ հայտնի դարձավ, որ Երևանի տրանսպորտի վճարման QR ուղետոմսերի վավերականության ժամկետը դարձել է 4 օր։ Համակարգի ներդրման պահին վավերականության ժամկետը 30 օր էր, նոյեմբերին հայտարարեցին, որ դարձել է 7 օր, տարեվերջին կրկին կրճատելով։

Երևանի նախկին քաղաքապետ Հայկ Մարությանը ֆեյսբուքյան իր էջում տեղեկացրել է, որ տրանսպորտի թանկացման հարցով դիմել է վարչապետ Նիկոլ Փաշինյանին և ակնկալում է պատասխան։