Անվտանգության աշխատակիցը ԱԺ ամբիոնից պոկել է ՀՀ ու Արցախի միասնական քարտեզը

PanARMENIAN.Net - Ազգային ժողովում այս տարվա նստաշրջանը սկսվել է Հայաստանի քարտեզի թեմայով ընդդիմության և իշխանության միջև հերթական բախումով։ Խորհրդարանի նիստերի դահլիճում փակցված քարտեզի մակետին, որտեղ բացակայում էր Արցախը, ընդդիմությունը որոշել է պատասխանել իր քայլով։«Պատիվ ունեմ» խմբակցության պատգամավոր Աննա Մկրտչյանը, ներկայացնելով Հայաստանի և Արցախի միասնական քարտեզը, այն փակցրել է ԱԺ նախագահության ամբիոնին։

Խորհրդարանի անվտանգության աշխատակիցը մտել է դահլիճ և հեռացրել է ԱԺ ամբիոնին փակցված Հայաստանի և Արցախի միասնական քարտեզը, հայտնում է «Ազատությունը»։

Մինչ այդ պատգամավոր Մրկտչյանը հիշեցրել է, որ ընդամենը մի քանի տարի առաջ հայրենիքն այս տեսքն ուներ, և մարդիկ իրենց առօրյան անցկացրել են այդ տարածքներում՝ երթևեկելով նրանց ճանապարհներով,

«Թող էս հայրենիքն ԱԺ-ում մնա այնքան ժամանակ, քանի դեռ այն մենք չենք վերականգնել»,- հայտարարել է Մկրտչյանը՝ ընդգծելով, որ ներկայիս իշխանությունները դավաճանաբար կորցրել են այդ տարածքները։

ԱԺ փոխնախագահ Ռուբեն Ռուբինյանը հակադարձել է ընդդիմադիր պատգամավորի խոսքերին՝ նշելով, որ ՀՀ երրորդ նախագահ Սերժ Սարգսյանը, որի ղեկավարած կուսակցությունն է ներկայացնում Մկրտչյանը, նախկինում հայտարարել է Ղարաբաղին հարակից 5+2 շրջանները հանձնելու պատրաստակամության մասին։

«Ուզում էր հանձնե՞լ հայրենիքը»,- հարցրել է Ռուբինյանը՝ ընդդիմադիրներին մեղադրելով կեղծավորության մեջ։