ԱՄՆ-ում չեղարկել են դաշնային հատկացումների, ֆինանսական օգնության դադարեցման մասին հրամանագիրը

PanARMENIAN.Net - ԱՄՆ նախագահ Դոնալդ Թրամփի վարչակազմը չեղարկել է դաշնային ֆինանսական օգնության դադարեցման մասին հրահանգը։ Այդ մասին հայտնել է Սպիտակ տան պաշտոնյան, գրում է Reuters-ը։

Հրահանգը չեղարկելու որոշումն ընդունվել է Ռոդ Այլենդի դաշնային դատարանի նիստից առաջ, որն անդրադառնալու էր 22 նահանգների և Կոլումբիայի շրջանի կողմից ներկայացված հայցին՝ պահանջելով ժամանակավոր արգելափակման միջոց։

Այս որոշումը վիճարկած 23 գլխավոր դատախազները պնդել են, որ այն հակասում է Սահմանադրությանը, քանի որ Կոնգրեսն արդեն սահմանել է ֆինանսական հատկացումների կարգը։ Թրամփի այս որոշումը հանգեցրել էր առողջապահական և երեխաների խնամքի հաստատությունների ֆինանսավորման խափանման։

ԱՄՆ դաշնային դատավորը հունվարի 28–ին ժամանակավոր որոշում էր կայացրել՝ կասեցնելով Թրամփի վարչակազմի հրահանգի մի մասը, որով դադարեցվում էին դաշնային վարկերը, դրամաշնորհները և այլ ֆինանսական աջակցությունը։ Սա հաղթանակ էր այն կազմակերպությունների համար, որոնք նախազգուշացրել էին քաղաքականության կործանարար հետևանքների մասին։

Վաշինգտոնում կայացած լսումների ժամանակ ԱՄՆ շրջանային դատավոր Լորեն Ալիքհանը կարգադրել է վարչակազմին առնվազն մինչև փետրվարի 3-ը չարգելափակել «բաց դրամաշնորհները»՝ այն միջոցները, որոնք արդեն հատկացված էին։

Դատավորը նշել է, որ իր որոշումը նպատակ ունի «պահպանել առկա կարգավիճակը»։ Այնուամենայնիվ, այս որոշումը չի արգելում վարչակազմին դադարեցնել նոր ծրագրերի ֆինանսավորումը կամ վերականգնել արդեն դադարեցված միջոցները։

ԱՄՆ Ոչ առևտրային կազմակերպությունների ազգային խորհուրդը, Հանրային առողջապահության ամերիկյան ասոցիացիան, Main Street Alliance-ն ու SAGE-ն երեքշաբթի դատական հայց էին ներկայացրել՝ վիճարկելով ԱՄՆ Կառավարման և բյուջեի գրասենյակի (OMB) ժամանակավոր ղեկավարի կողմից հրապարակված հրահանգը։

Ըստ հայցվորների՝ OMB-ն իրավասու չէր ինքնուրույն կասեցնել բոլոր դաշնային ֆինանսական աջակցության ծրագրերը։ Նրանք նաև պնդել են, որ այս քաղաքականությունը խտրականություն է պարունակում դրամաշնորհ ստացողների նկատմամբ՝ խախտելով նրանց խոսքի և միավորման ազատության սահմանադրական իրավունքները։

OMB-ի ժամանակավոր տնօրեն Մեթյու Վայթն ասել է, որ միջոցները կսառեցվեն, քանի դեռ վարչակազմը վերանայում է դրամաշնորհներն ու վարկերը՝ համոզվելու համար, որ դրանք համապատասխանում են հանրապետական նախագահ Դոնալդ Թրամփի առաջնահերթություններին, ներառյալ այն գործադիր հրամանները, որոնք ուղղված են բազմազանության, հավասարության և ներառականության ծրագրերի վերացմանը։

Թրամփի վարչակազմը վստահեցրել է, որ կենսական նշանակություն ունեցող ծրագրերը չեն տուժի ֆինանսավորման դադարեցումից։