«Հայաքվե»․ Շարունակվում է մշակույթի ու բնակավայրերի սպանդն օկուպացված Արցախում

«Հայաքվե»․ Շարունակվում է մշակույթի ու բնակավայրերի սպանդն օկուպացված Արցախում

PanARMENIAN.Net - Ադրբեջանի կողմից օկուպացված Արցախում մշակութային ժառանգության և բնակավայրերի ոչնչացումը շարունակվում է՝ ուղեկցվելով հայերի մասին պատմական խեղաթյուրումներով։ Այդ մասին հայտարարություն է տարածել «Հայաքվե» նախաձեռնությունը։

«Այսօր շարունակվում է մշակույթի ու բնակավայրերի սպանդը օկուպացված Արցախում։ Դպրոցական և բուհական կրթական ծրագրերը, հեռուստատեսությունը, ռադիոն, համացանցը, ամբողջը լծված են հայերի եկվոր, բարբարոս լինելու մասին կեղծ թեզեր ու պատմություններ հորինելու և տարածելու գործին, անգամ տարրական դասարանների մաթեմատիկայի խնդիրներն են ձևակերպվում այնպես, որ հայերի հանդեպ ատելություն բորբոքեն։

Եվ այս ամենով հանդերձ` այս օրերին նացիստական Բաքվի պաշտոնական խոսույթն ու քարոզչամեքենան սևեռված են Հայաստանին և հայ ժողովրդին որպես ֆաշիստ պիտակավորելու վրա։ Այս ակտիվության պատճառներից մեկն այն է, որ առաջիկայում Հայաստանի հանդեպ ագրեսիա իրականացնելուց առաջ ուզում են աշխարհին նախապատրաստել, տրամադրել նրան, որ իրենց ագրեսիան հակազդեցության չհանդիպի պետությունների կողմից, որ տարբեր պետությունների քաղաքացիները չպահանջեն իրենց ղեկավարություններից՝ դեմ կանգնել ադրբեջանական ագրեսիային»,–ասվում է հայտարարության մեջ։

2024-ի հոկտեմբերին ՅՈՒՆԵՍԿՕ-ի Մշակույթի և Արտակարգ իրավիճակների կազմակերպության տնօրեն, 1954 թվականի Հաագայի կոնվենցիայի և դրա երկու արձանագրությունների (1954 և 1999 թթ.) քարտուղար Քրիստա Պիկատն ասել է, որ Լեռնային Ղարաբաղն արդեն երկար տարիներ է, ինչ գտնվում է ՅՈՒՆԵՍԿՕ-ի ուշադրության կենտրոնում․ «կառույցը մտահոգված է տարբեր ծագում ունեցող և տարբեր տեսակի մշակութային արժեքների ենթադրյալ ոչնչացման մասին զեկույցներով»։

 Ուշագրավ
Պլասիդո Դոմինգոն Երևանում ելույթ է ունեցել նաև 2010–ին
Փեյնի հեղինակած 8 լիամետրաժ ֆիլմերն առաջադրվել են ընդհանուր թվով 24 Օսկարի
Տիգրան Ավինյանն ու Գրեգորի Դուսեն այցելել են պատմական թաղամաս
---