Գրիգորյան․ ԱԲ–ն կարող է օգնել ստեղծել ԵԱՏՄ տրանսպորտային միջոցների էլեկտրոնային անձնագրեր

PanARMENIAN.Net - ՀՀ փոխվարչապետ Մհեր Գրիգորյանը Ղազախստանում անցկացվող Digital Almaty համաժողովի ժամանակ հայտարարել է, որ ԵԱՏՄ շրջանակում արհեստական բանականության կիրառումը կարող է նպաստել ապրանքների, ծառայությունների, կապիտալի և մարդկանց ազատ տեղաշարժի զարգացմանը։

Միասնական թվային համակարգերում նորարարական մեխանիզմների ինտեգրման համար կարևոր է ԵԱՏՄ վերազգային կառույցների, մասնավորապես՝ Թվային նախաձեռնությունների հիմնադրամի ակտիվ ներգրավվածությունը, գրում է Sputnik Արմենիան։

«Խոսքը հիմնադրամի այնպիսի նախագծերի մասին է, ինչպիսիք են աշխատանքի էլեկտրոնային բորսան և տրանսպորտային միջոցների էլեկտրոնային անձնագրերը»,–հավելել է փոխվարչապետը։

Գրիգորյանը շեշտել է, որ Հայաստանի համար թվայնացման գործընթացները ռազմավարական նշանակություն ունեն։ Դրանք հնարավորություն են տալիս թե՛ գործարարներին, թե՛ քաղաքացիներին կրճատել նյութական ու ժամանակային ծախսերը, իսկ պետությանը՝ նվազեցնել վարչարարական խոչընդոտները։

Հայաստանում իրականացվող առցանց հարթակների ներդրման արդյունքում ստեղծվում է պետական կառույցների հետ փոխգործակցության բարենպաստ միջավայր։ ՀՀ փոխվարչապետը նաև ընդգծել է, որ տվյալների նման շտեմարանները ազգային արժեք են և հնարավորություն են տալիս ապահովել անհատականացված պետական ծառայություններ։

Մհեր Գրիգորյանը գլխավորում է ՀՀ պատվիրակությունը, որը Ղազախստանում մասնակցում է հունվարի 30-31-ը կայացող ԵԱՏՄ միջկառավարական խորհրդի նիստին։

Երևանի ավագանին 33 կողմ ձայնով ընդունել է որոշումը, որով հանրային տրանսպորտում մեկ ուղևորության սակագինը սահմանվել է 150 դրամ։ Նախատեսվում է նաև ներդնել միասնական տոմսային համակարգի փաթեթներ, որոնք կգործեն նոր պայմաններով։