Զանգեզուրի պղնձամոլիբդենային կոմբինատի (ԶՊՄԿ) ավելի քան 700 աշխատակից հունվարի 31–ի առավոտից գործադուլ է հայտարարել՝ պահանջելով աշխատավարձերի բարձրացում, հայտնում է «Հետքը»։

ԶՊՄԿ-ն 2024 թվականի Հայաստանի խոշորագույն հարկատուն է։

Գործադուլի մասնակիցներից մեկը, որը չի ցանկացել հրապարակել իր անունը, հայտնել է, որ իրենց պահանջը սոցիալական արդարության ապահովումն է։

«Չնայած այն հանգամանքին, որ թմբկահարվում է, թե Քաջարանում աշխատավարձերը բարձր են՝ հաշվի չեն առնում, որ այստեղ կյանքը թանկ է, առողջապահական համակարգ չկա, մարդիկ ստիպված են Կապան կամ Երևան գնալ դրա համար»,- նշել է նա։

Նրա խոսքով՝ գործադուլավորները ներկայացրել են երկու հիմնական պահանջ՝ աշխատավարձերի 50 տոկոսով (130-150 հազար դրամով) բարձրացում և աշխատակիցների ու ղեկավարության միջև երկխոսության ապահովում։

«Աշխատավարձերը ցածր են հիմնականում աշխատավորների համար, մինչդեռ միջին և բարձր օղակները ստանում են բավականին մեծ տարբերությամբ բարձր գումարներ։ Բացի այդ, կարելի է ասել, որ ամբողջությամբ բացակայում է երկխոսությունը աշխատավորների և վերադասի միջև, ինչը բերում է բազմաթիվ խնդիրների՝ հետադարձ կապի բացակայություն, աշխատանքի կազմակերպման խոչընդոտներ, աշխատանքի որակի հարցեր և այլն»,- նշել է աշխատակիցը։

Նրա խոսքով՝ այս հարցերը բազմիցս բարձրաձայնվել են, սակայն մինչ գործադուլ նախաձեռնելը դրանք ներկայացվել են նաև ԶՊՄԿ-ի ղեկավարությանը, սակայն պատասխան կամ լուծում չեն ստացել։

Գործադուլից առաջ, աշխատակիցները հանդիպել են կոմբինատի ղեկավարությանը, սակայն զրուցակցի փոխանցմամբ՝ հանդիպումը անցել է ոչ կառուցողական մթնոլորտում, և իրենց ներկայացրած պահանջները չեն բավարարվել, ինչից հետո նրանք որոշել են գործադուլ սկսել։ Գործադուլավորների հետ հանդիպել է նաև Քաջարանի համայնքապետ Մանվել Փարամազյանը։ Աշխատակիցների խոսքով՝ հանդիպումը եղել է կառուցողական։

Ըստ կոմբինատի աշխատակիցների՝ գործադուլի հետևանքով հունվարի 31–ին կոմբինատը չի գործել։ Նրանք հայտարարում են, որ մինչև իրենց պահանջները չկատարվեն, չեն վերադառնա աշխատանքի։

«ԶՊՄԿ» ՓԲԸ-ն և «ԶՊՄԿ» ՓԲԸ արհմիությունը համատեղ հայտարարությամբ է հանդես եկել՝ նշելով, որ վերոնշյալ գործողությունները գործադուլ չի համարում և չի աջակցում դրանց՝ համարելով ոչ իրավաչափ։

«Աշխատակիցների անօրինական գործողությունների պատճառով Ընկերության արտադրական ցիկլը խաթարվել է, Ընկերությունը և մնացած աշխատակիցները կրում են զգալի նյութական վնաս։

Եթե վերոնշյալ անօրինական գործողությունները շարունակվեն, Ընկերությունը ստիպված կլինի իր աշխատակիցների զգալի թվին ուղարկել հարկադիր պարապուրդի:

Հաշվի առնելով վերը նշվածը, ելնելով «ԶՊՄԿ»ՓԲԸ և Ընկերության աշխատակիցների ճնշող մեծամասնության շահերից, Ընկերությունը կիրացնի աշխատանքային պարտավորությունները խախտողներին կարգապահական պատասխանատվության ենթարկելու իր իրավունքները՝ համաձայն ՀՀ աշխատանքային օրենսգրքի 21-րդ գլխի»,- ասվում է հայտարարությունում։