Le Parisien–ը՝ Ռուբեն Վարդանյանի դատավարության մասին․ Բաքուն կարծես վճռական է «իր համար ռազմավար ապահովելու հարցում»![]() 1 փետրվարի 2025 - 14:49 AMT PanARMENIAN.Net - Ֆրանսիական Le Parisien պարբերականը անդրադարձել է Ռուբեն Վարդանյանի կեղծ դատավարությանը՝ նշելով, որ բեմադրելով այս կեղծ դատավարությունը՝ Ադրբեջանի իշխանությունները կարծես թե վճռական են իրենց համար ռազմավար ապահովելու հարցում: «Մարդ, որին հարկավոր է տապալել. Ռուբեն Վարդանյանը՝ կեղծ դատավարության զոհ Ադրբեջանում» հոդվածում նշվում է, որ նրան առաջադրվել է 42 մեղադրանք, ներառյալ «ահաբեկչություն» և «սպանություն»։ Նշվում է, որ Տեղական լրատվամիջոցները մշտապես կրկնում են այս մեղադրանքները, իսկ Վարդանյանին սպառնում է մինչև 200 տարվա ազատազրկում, հայտնում է «Առավոտը»։ Հոդվածագիրը հիշեցնում է, որ նա հաջողակ գործարար էր և «Ավրորա» մարդասիրական նախաձեռնության համահիմնադիրը։ Սակայն 2020 թվականին, երբ Ադրբեջանը վերսկսեց հարձակումը Լեռնային Ղարաբաղի վրա, Վարդանյանի կյանքը կտրուկ փոխվեց։ «Այս պատերազմը նրա համար կարմիր գիծն էր։ Ամբողջ աշխարհի կողմից հայերին լքված տեսնելը նրա համար անտանելի էր»,- ասել է նրա որդին՝ Դավիթ Վարդանյանը։ Նրա որդին հիշատակել է վերջին զրույցը հոր հետ՝ մինչ նրա մեկնումը. «Ես դեմ էի նրա որոշմանը։ Վախենում էի, որ նա այնտեղից կենդանի չվերադառնա…»։ «Վարդանյանը ձերբակալվում է սեպտեմբերի 27-ին՝ սահմանը հատելու փորձի ժամանակ։ Նրա ձեռնաշղթայված լուսանկարները տարածվում են աշխարհով մեկ։ Դրանից հետո սկսվում է կեղծ դատական գործընթացը. բանտում նա ենթարկվում է խոշտանգումների, հացադուլի ընթացքում զրկվում հարազատների հետ կապից, իսկ 23 օր անցկացվում է կարգապահական խցում՝ առանց ջրի և սննդի»,–ասվում է հոդվածում։ «Նա հազիվ կարողանում էր նստել, լույսերը 24 ժամ միացված էին պահում»,- արձանագրում է նրա փաստաբան Ջարեդ Գենսերը։ Փաստաբանը դատական գործընթացը որակում է որպես «ցուցադրական դատավարություն»՝ շեշտելով, որ 25,000 էջանոց մեղադրական նյութը գրված է ադրբեջաներեն, իսկ Վարդանյանը այդ լեզվին չի տիրապետում։ Բացի այդ, նրան դատում են ռազմական դատարանում, թեև երբեք զինվորական ծառայության չի անցել։ «Դա Մարդու իրավունքների եվրոպական կոնվենցիայի կոպտագույն խախտում է»,- հայտարարում է Գենսերը՝ ընդգծելով, որ իր պաշտպանյալի հետ անմիջական շփում չի ունեցել։ «Կարծում եմ, որ նա երկարաժամկետ պատիժ կստանա, գուցե նույնիսկ դատապարտվի ցմահ ազատազրկման»։ Նշվում է, որ ադրբեջանական լրատվամիջոցները շարունակում են Վարդանյանին «ռազմական հանցագործ» անվանել՝ նրան դարձնելով քաղաքական քարոզչության թիրախ՝ բեմադրելով այս կեղծ դատավարությունը՝ իշխանությունները կարծես թե վճռական են իրենց համար ռազմավար ապահովելու հարցում: «Ռուբեն Վարդանյանն այն մարդն է, որից ռեժիմն ամենաշատն է վախենում, հենց նրան է հարկավոր տապալել: Իլհամ Ալիևին անհրաժեշտ է այս պատմական դատավարությունը՝ անկախ Լեռնային Ղարաբաղի էջը շրջելու համար»,- նշել է Շիլլերի անվան միջազգային համալսարանի պրոֆեսոր Տիգրան Եգավյանը։ Հունվարի 16-ին Վարդանյանը նամակ է հղել, որտեղ դատապարտել է իր դատավարության պայմանները՝ հավելելով. «Համոզված եմ, որ ճշմարտությունը կհաղթի»,–ասվում է հոդվածում։ 2023 թ․ սեպտեմբերին, Արցախում իննամսյա շրջափակումից և ամբողջ հայ բնակչության էթնիկ զտումից հետո, Ադրբեջանը գերեվարել է Արցախի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին, ինչպես նաև նախկին պետնախարար Ռուբեն Վարդանյանին, արտգործնախարար Դավիթ Բաբայանին և մի շարք այլ նախկին ղեկավարների։ Նրանց ներկայացված կեղծ մեղադրանքները կարող են հանգեցնել նույնիսկ ցմահ ազատազրկման։ Հունվարի 17-ին Բաքվում կայացել է Արցախի ղեկավարների գործով դատավարության առաջին նիստը։ Ռուբեն Վարդանյանը հունվարի 16-ին իր ուղերձում նշել է, որ ձերբակալման օրվանից ոչ մի ցուցմունք չի տվել, բացի իր անուն-ազգանունից։ Նա ընդգծել է, որ իր ստորագրությամբ կազմված բոլոր արձանագրությունները կեղծ են և հաստատել է, որ իրեն, իր փաստաբանին ու թարգմանչին ենթարկել են ճնշումների։ ![]() ![]()
Ընդգծվել է ուժի կիրառման անընդունելիությունը և կոչ է արվել ձեռնպահ մնալ ռազմատենչ հռետորաբանությունից «Մեզ ասում էին, թե մեր խոսքերը չափազանց կտրուկ են, որ դա չի մոտեցնում խաղաղությունը»,–բողոքել է նա Հաջիզադեն ասել է, թե հայտարարությունը «զարմանք է առաջացնում», և մեղադրանքներ հնչեցրել Հայաստանի հասցեին
Նա հավելել է, որ Թուրքիան աջակցում է Ադրբեջանի և ՀՀ միջև խաղաղության գործընթացին ![]() ![]() ![]() | ![]() ![]() ![]() ![]() ![]() ![]() ![]() ![]() |