Հունաստանը Եվրատեսիլում կներկայանա Պոնտոսի հույների մասին երգով․ Թուրքիան ուսումնասիրում է այն

PanARMENIAN.Net - Հունաստանը Եվրատեսիլում կներկայացնի 22-ամյա երգչուհի Կլավդիան՝ Asteromata («Աստղի պես աչքեր») երգով: Հունական ERT հանրային հեռուստատեսությանը տված հարցազրույցում Կլավդիան պատմել է, որ ինքը ծագումով Պոնտոսի հույն է և որ իրեն ոգեշնչում է ցեղասպանություն և աքսոր վերապրած պոնտոսցի հույների պատմությունը, որ իր տատիկը փախստական է եղել, իսկ երգը գաղթականի կյանքի, հայրենիքի կորստի և հակամարտող աշխարհում ավելի լավ կյանք փնտրելու մասին է։

Նա պատմել է, որ իր նախնիները Պոնտոսի հույներ են եղել, որոնք ստիպված են եղել գաղթել և բնակություն հաստատել ԽՍՀՄ–ում, որտեղ ծնվել են նրա ծնողները, որոնք էլ 1991–ին վերադարձել են Հունաստան։

Թուրքիայի Հանրային հեռուստատեսությունը (TRT) հայտարարել է, որ կուսումնասիրի, թե արդյոք երգը վերաբերում է Պոնտոսի հույների ցեղասպանության մասին պնդումներին, գրում է Famagusta.news-ը:

Նշվել է, որ քանի որ եվրատեսիլյան երգում չպետք է լինեն քաղաքական ուղերձներ, ապա Eurovision Türkiye, նման միտում հայտնաբերելու դեպքում, «կհասցնի իր դժգոհությունը ամենաբարձր մակարդակով»։

Հունաստանի կառավարության պաշտոնական ներկայացուցիչ Պավլոս Մարինակիսը հայտարարել է, որ Հունաստանի կողմից ընտրված «Աստերոմատա» երգը չի պարունակում ո՛չ քաղաքական ենթատեքստ, ո՛չ էլ որևէ մեկի հասցեին վիրավորական արտահայտություններ, և չի հիշատակում պատմական իրադարձությունները, հայտնում է Sputnik Արմենիան։

Նա ավելացրել է, որ ամեն դեպքում, անկախ «Եվրատեսիլից» և այս կոնկրետ երգից, պատմությունը փաստագրված է և չի կարող կասկածի տակ դրվել։ Կառավարության ներկայացուցիչը հաջողություն է մաղթել հույն կատարողին։

Եվրատեսլիը կանցնի շվեյցարական Բազելում մայիսի 13–ին, 15–ին և 17–ին։

Հունաստանն ամեն տարի մայիսի 19–ին հարգում է Օսմանյան կայսրությունում Պոնտոսի հույների ցեղասպանության զոհերի հիշատակը։