Ուկրաինան հրավիրված չէ այն քննարկումներին, որոնք նախատեսված են ԱՄՆ և Ռուսաստանի միջև՝ ուղղված պատերազմն ավարտելուն։ Այդ մասին հայտնել է Ուկրաինայի կառավարության բարձրաստիճան պաշտոնյան, գրում է BBC-ն։

Չնայած ԱՄՆ հատուկ բանագնաց Քիթ Քելլոգը հայտարարել էր, որ Կիևը կմասնակցի Սաուդյան Արաբիայում նախատեսված փետրվարի 17–ի բանակցություններին, աղբյուրը նշել է, որ ուկրաինական պատվիրակություն այնտեղ չի լինելու։

Եվրոպացի առաջնորդներին նույնպես չեն հրավիրել այդ քննարկումներին։ Փոխարենը, նրանք երկուշաբթի օրը կհանդիպեն Փարիզում՝ նախագահ Էմանուել Մակրոնի արագ կազմակերպված գագաթնաժողովի շրջանակում, քանի որ մտահոգություններ են առաջանում, որ Եվրոպան դուրս է մնում պատերազմի կարգավորման բանակցություններից։

Այս առանձին հանդիպումները տեղի են ունենում այն ​​բանից հետո, երբ Վաշինգտոնը զգալի փոփոխություն է կատարել Ուկրաինայի պատերազմի վերաբերյալ իր դիրքորոշման մեջ։ Սպիտակ տան Մերձավոր Արևելքի բանագնաց Սթիվ Ուիթքոֆը հաստատել է, որ կմեկնի Սաուդյան Արաբիա՝ ԱՄՆ-Ռուսաստան առաջին ուղիղ խաղաղ բանակցությունների համար։

Փետրվարի 16–ին ԱՄՆ նախագահ Դոնալդ Թրամփը հայտնել է, որ Ուիթքոֆն արդեն խոսել է Վլադիմիր Պուտինի հետ «շատ երկար, մոտ երեք ժամ»։

Ուիթքոֆը, ով միլիարդատեր անշարժ գույքի ներդրող է և Թրամփի մտերիմը, Մոսկվայում էր՝ բանակցելու մարիխուանայի պահման մեղադրանքով բանտարկված ամերիկացի ուսուցչին ազատ արձակելու շուրջ։

ԱՄՆ պետքարտուղար Մարկո Ռուբիոն և ազգային անվտանգության հարցերով խորհրդական Մայք Ուոլցը նույնպես պատրաստվում են հանդիպել ռուսական պատվիրակության հետ Սաուդյան Արաբիայում, ընդամենը մեկ շաբաթ անց այն բանից հետո, երբ Թրամփը զրուցեց Պուտինի հետ։

Ուկրաինայի նախագահ Վլադիմիր Զելենսկին մշտապես մերժել է այնպիսի խաղաղ համաձայնագիր, որը չի ներառում Ուկրաինայի անմիջական մասնակցությունը։

NBC-ին տված հարցազրույցում նա ընդգծել է. «Ես երբեք չեմ ընդունի որևէ որոշում ԱՄՆ-ի և Ռուսաստանի միջև Ուկրաինայի վերաբերյալ, երբեք»։

Ուիթքոֆն ընդգծել է, որ ԱՄՆ պաշտոնյաներն առանձին քննարկումներ են վարում ուկրաինական կողմի հետ, սակայն չի նշել՝ արդյոք Կիևը ներկա կլինի Սաուդյան Արաբիայում։

Այս ֆոնին Մակրոնը նախատեսում է փետրվարի 17–ին անցկացնել ոչ պաշտոնական հանդիպում՝ քննարկելու Ուկրաինան և Եվրոպական անվտանգության հարցերը։

Սպասվող գագաթնաժողովի նախաշեմին Մեծ Բրիտանիայի վարչապետ Քիր Սթարմերը հայտարարել է, որ երկիրը պատրաստ է ապահովել Ուկրաինայի անվտանգության երաշխիքները, ներառյալ՝ անհրաժեշտության դեպքում բրիտանական զորքերի տեղակայմամբ։

Daily Telegraph-ում հրապարակած հոդվածում նա ընդգծել է, որ Ուկրաինայում կայուն խաղաղության ապահովումը «էական է, եթե ցանկանում ենք կանխել Պուտինի հետագա ագրեսիան ապագայում»։

Մինչդեռ, ԱՄՆ-ի Ուկրաինայի հարցերով բանագնաց Քիթ Քելլոգը մերժել է Եվրոպայի՝ Սաուդյան Արաբիայում անցկացվող բանակցություններից դուրս մնալու հետ կապված մտահոգությունները՝ պնդելով, որ նախկին բանակցություններն անհաջող են եղել չափազանց շատ մասնակիցների ներգրավվածության պատճառով։

«Դա կարող է նյարդայնացնել, կարող է անհանգստացնել, բայց ես ձեզ ասում եմ մի բան, որը իսկապես շատ ազնիվ է”,– ասել է նա։

Այս զարգացումները նշանավորում են ԱՄՆ նախագահ Դոնալդ Թրամփի ջանքերի արագացումը՝ ուղղված պատերազմի շուտափույթ ավարտին։

Ռուսաստանի նախագահ Վլադիմիր Պուտինի հետ հեռախոսազրույցից հետո Թրամփն ասել էր, որ Ուկրաինայում «անիմաստ պատերազմի» դադարեցման բանակցությունները կսկսվեն անհապաղ։

Նա նաև հայտարարել է, որ ՆԱՏՕ–ին Ուկրաինայի անդամակցությունը «պրակտիկ չէ» և որ քիչ հավանական է, որ Կիևը վերականգնի իր 2014-ից առաջ եղած սահմանները։

Թրամփի դիրքորոշումը մտահոգություն է առաջացրել Եվրոպայում, հատկապես այն բանից հետո, երբ նրա պաշտպանության նախարարը կրկնել է նման հայտարարությունները՝ խորացնելով կասկածները, որ ԱՄՆ-ն կարող է զիջումներ անել Ռուսաստանին՝ առանց Ուկրաինայի մասնակցության։

ԱՄՆ պաշտպանության նախարար Փիթ Հեգսեթն ընդգծել է, որ եվրոպական երկրները պետք է ստանձնեն Ուկրաինայի պաշտպանության ֆինանսավորման «խիստ մեծ» մասը՝ հայտարարելով, որ Վաշինգտոնն այլևս չի «հանդուրժի անհավասարակշիռ հարաբերություններ» իր դաշնակիցների հետ։

Փոխնախագահ Ջեյ Դի Վենսը Մյունխենի անվտանգության համաժողովում կրկնել էր այս ուղերձը՝ կոչ անելով Եվրոպային «մեծ ջանքեր գործադրել սեփական պաշտպանության համար»։ Նրա ելույթի հիմնական մասը նվիրված էր եվրոպական ժողովրդավարությունների քննադատությանը։

Ի պատասխան՝ Ուկրաինայի նախագահ Վլադիմիր Զելենսկին կոչ է արել ստեղծել եվրոպական բանակ՝ պնդելով, որ մայրցամաքն այլևս չի կարող հույս դնել Վաշինգտոնի աջակցության վրա։

Մինչ դիվանագիտական զարգացումներ են ընթանում, պատերազմն Ուկրաինայում դեռ շարունակվում է։ Կիրակի օրը Զելենսկին հայտնել է, որ ռուսական հարվածի հետևանքով Միկոլաևում առնվազն 100,000 մարդ մնացել է առանց էլեկտրականության։ Նա նշել է, որ անօդաչու սարքի հարվածը վնասել է քաղաքի «կրիտիկական ենթակառուցվածքը», ինչի հետևանքով շատ բնակիչներ մնացել են առանց ջեռուցման։

Ռուսաստանը Ուկրաինայի դեմ լայնամասշտաբ ներխուժում սկսեց 2022 թվականի փետրվարի 24-ին՝ դրանից առաջ, 2014 թվականին, արդեն բռնակցելով Ղրիմն ու գրավելով Դոնբասի որոշ տարածքներ։