Դմիտրի Մասլեևը Հայաստանի ազգային ֆիլհարմոնիկի հետ հանդես է եկել բացառիկ համերգով

PanARMENIAN.Net - Աշխարհահռչակ դաշնակահար Դմիտրի Մասլեևը, ով բազմիցս արժանացել է միջազգային հեղինակավոր մրցանակների, այդ թվում՝ Չայկովսկու 15-րդ միջազգային մրցույթի առաջին մրցանակին, նշել է, որ մեծ հաճույք է կրկին հանդես գալու Հայաստանի ազգային ֆիլհարմոնիկ նվագախմբի հետ։

«Արդեն երկրորդ անգամն եմ ելույթ ունենում Հայաստանի ազգային ֆիլհարմոնիկ նվագախմբի հետ: Շատ տպավորված եմ նրանով, թե երաժիշտները որքան նրբորեն են զգում մենակատարի մեկնաբանության մտադրությունները և որքան արագ ու նրբացգաց են արձագանքում»,- «Արամ Խաչատրյան» համերգասրահում համատեղ ելույթից հետո ասել է դաշնակահարը, հայտնում է Panorama.am–ը։

Մասլեևն ընդգծել է, որ չափազանց երջանիկ է կրկին գտնվել այս բացառիկ դահլիճում և հանդիպել հայ երաժշտասեր հանրության հետ։

«Անհամբեր կսպասեմ հաջորդ ելույթիս»,- ասել է Մասլեևը։

Համերգը ղեկավարել է Հայաստանի ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը։

Մասլեևի կատարմամբ հնչել է Սերգեյ Ռախմանինովի Դաշնամուրի թիվ 3 կոնցերտը, որը հանդիսատեսը մեծ խանդավառությամբ է ընդունել։ Համերգի երկրորդ բաժնում ներկայացվել է Գուստավ Հոլսթի «Մոլորակներ» սիմֆոնիկ սյուիտը, որը ներառում է յոթ մաս՝ նվիրված Արեգակնային համակարգի այն մոլորակներին, որոնք տեսանելի են Երկրից՝ Մարս, Վեներա, Մերկուրի, Յուպիտեր, Սատուրն, Ուրան և Նեպտուն։

Մասլեևը նաև վարպետության դաս է անցկացրել «Արամ Խաչատրյան» համերգասրահի նորաբաց «Հարմոնիկ» սրահում՝ հանդիպելով երիտասարդ դաշնակահարների հետ կլոր սեղանի ձևաչափով։ Նա ղեկավարում է Primavera Foundation of Armenia մշակութային հիմնադրամի դաշնամուրային ծրագիրը և այս նախաձեռնության շրջանակում պարբերաբար անվճար վարպետության դասեր է անցկացնում Հայաստանում։ Այս անգամ նա երիտասարդ երաժիշտների հետ ուսումնասիրել է Ռախմանինովի, Շումանի և Պրոկոֆևի ստեղծագործությունները՝ բացահայտելով կատարողական վարպետության գաղտնիքներ և ոգեշնչելով նրանց նոր նվաճումների։

Դաշնակահարը նկատել է, որ շատ տպավորված է երիտասարդների հետաքրքրվածությամբ վարպետության դասերի հանդեպ.։

«Այս անգամ 5 տեղի համար ունեցանք 17 դիմում, հայտ էր ներկայացվել անգամ Իրանից, ընտրվելու դեպքում դաշնակահարը պատրաստ էր ժամանել Երևան: Տպավորված եմ մասնակիցների բարձր մասնագիտական մակարդակով։ Եվ ամենակարևորը, նրանք մեծ նվիրում ունեն, «վառվում» են իրենց գործով և անում են իրենց լավագույնը››,–ասել է նա։