Զելենսկին պատրաստ է հեռանալ պաշտոնից՝ հանուն խաղաղության կամ ՆԱՏՕ-ի անդամակցության

PanARMENIAN.Net - Ուկրաինայի նախագահ Վլադիմիր Զելենսկին հայտարարել է, որ պատրաստ է հեռանալ նախագահի պաշտոնից, եթե դա կնպաստի երկրում խաղաղության հաստատմանը, կամ եթե իր հրաժարականը լինի ՆԱՏՕ-ին Ուկրաինայի անդամակցելու պայման։ Նա այդ մասին ասել է փետրվարի 23-ի մամուլի ասուլիսի ժամանակ։

Հարցին՝ արդյոք նա պատրաստ է լքել պաշտոնը, եթե դա խաղաղություն ապահովի, Զելենսկին պատասխանել է. «Եթե Ուկրաինայի համար խաղաղություն է, եթե ձեզ շատ պետք է, որ ես հեռանամ իմ պաշտոնից, ապա ես պատրաստ եմ։ Երկրորդ պատմությունն այն է, որ կարող եմ դա փոխանակել ՆԱՏՕ-ի հետ, եթե նման պայման կա։ Անմիջապես (ասում եմ – խմբ․), որպեսզի երկար չխոսենք այդ մասին», հայտնում է Pravda.com.ua-ն։

Պետության ղեկավարը նշել է, որ իր հիմնական ուշադրությունը կենտրոնացած է երկրի անվտանգության ապահովման վրա «ոչ թե 20 տարի անց, այլ հենց այսօր»՝ հավելելով, որ մտադիր չէ երկար մնալ իշխանության ղեկին։

«Դա հավանաբար իմ հիմնական ուղղվածությունն է և ցանկալի երազանքս», – հավելել է նա։

Զելենսկին կրկին շեշտել է, որ ՆԱՏՕ-ին անդամակցությունը մնում է Ուկրաինայի անվտանգության երաշխավորման ամենաարդյունավետ և ծախսարդյունավետ տարբերակը։

«Ամեն դեպքում, ուզում է դա որևէ մեկը, թե ոչ, աջակցում է այդ գաղափարին, թե ոչ, այդ թեման առկա է սեղանին։ Եվ անվտանգության երաշխիքների և բանակցությունների սեղանին այդ թեման կլինի։ Ես չգիտեմ, թե ինչով կավարտվեն բանակցությունները, բայց ցանկացած ձևաչափով, ցանկացած դեպքում դա սեղանին կլինի։ Մենք այս հարցը կքննարկենք մեր գործընկերների հետ»։

Նա ընդգծել է, որ Ուկրաինան բանակցությունների հրավիրված կողմ չէ, այլ հենց բանակցությունների նախաձեռնողն է, քանի որ պատերազմն ընթանում է իր տարածքում։

«Եվ այստեղ շատ կարևոր է, որ բոլորս հասկանանք՝ սա ոչ թե բանակցությունների սեղան է, ուր հրավիրում են Ուկրաինային։ Սա մեր սեղանն է, որովհետև պատերազմն ընթանում է Ուկրաինայում։ Սա մենք ենք հրավիրում, առաջին հերթին, մեր եվրոպացի առաջնորդներին, քանի որ պատերազմն ընթանում է Ուկրաինայում, իսկ մենք հանդիսանում ենք այս մայրցամաքի՝ Եվրոպայի, ապագա Եվրամիության անբաժանելի մասը», – նշել է Զելենսկին։

Նրա խոսքով՝ խաղաղության և անվտանգության երաշխիքների հարցով բանակցությունների սեղանի շուրջ պետք է լինեն Եվրոպան և ԱՄՆ-ն։

«Մենք ցանկանում ենք ավարտել պատերազմը, և մեր գործընկերներն էլ են ցանկանում։ Նրանք ցանկանում են, որ այնտեղ լինի նաև Ռուսաստանը, և Ռուսաստանը կլինի։ Ես իսկապես հավատում եմ, որ ԱՄՆ նախագահ Թրամփը ցանկանում է և կօգնի մեզ ավարտել այս պատերազմը, բայց խաղաղությունը ուժի միջոցով նախ և առաջ նշանակում է ուժը ուղղել դեպի Ռուսաստան», – եզրափակել է Զելենսկին։

Եվրոպայի մի շարք երկրներում ցույցեր են անցկացվել՝ հաջակցություն Ուկրաինայի։

Փետրվարի 23–ին Բրյուսելում անցկացվել է խաղաղ ցույց, որին մասնակցել է մի քանի հազար մարդ։ Ցուցարարները կատարել են Ուկրաինայի օրհներգը և վանկարկել․ «Ռուսաստանը պետք է պատասխան տա», «Փառք Ուկրաինային», «Խաղաղություն Եվրոպային, հաղթանակ Ուկրաինային», հայտնում է «Էխո Կավկազա»–ն։

Ցույցի ընթացքում հնչեցվել է օդային տագնապի ազդանշան, որը Ուկրաինայի բնակիչները գրեթե ամեն օր լսում են ռուսական հրթիռակոծությունների ժամանակ։

Նույն օրը Ուկրաինայի աջակցության երթ է անցկացվել նաև Պրահայում։ Հազարավոր մարդիկ հավաքվել են քաղաքի կենտրոնում՝ Հին քաղաքի հրապարակում։ Բազմությանը դիմել է Չեխիայի նախագահ Պետր Պավելը՝ ընդգծելով, որ Ուկրաինա ներխուժելով՝ Ռուսաստանը դարձել է ագրեսոր և խախտել միջազգային իրավունքը։

Վերջին օրերին նմանատիպ ցույցեր են անցկացվել աշխարհի հարյուրավոր քաղաքներում։

ԱՄՆ նախագահ Դոնալդ Թրամփի և Ուկրաինայի նախագահ Վոլոդիմիր Զելենսկու միջև բանավեճը ավելի է սրվել այն բանից հետո, երբ Թրամփը Զելենսկուն անվանել է «բռնապետ»։ Թրամփի քննադատությունը հաջորդել է Զելենսկու ավելի վաղ արված հայտարարությանը, որտեղ ուկրաինացի առաջնորդն ասել էր, որ Թրամփն ընկել է Ռուսաստանի «խեղաթյուրված տեղեկատվության տարածության» մեջ։ Սա հետևել է Թրամփի պնդմանը, թե Զելենսկու նախագահությունը ոչ լեգիտիմ է, քանի որ Ուկրաինայում ընտրություններ չեն անցկացվել։