Շվեդիայի խորհրդարանի պատգամավոր Էրիկ Հելսբորնը ողջունել է Հայաստանում Եվրոպական միության առաքելության մանդատի երկարաձգումը՝ ընդգծելով, որ դա կարող է նպաստել Հայաստանի նկատմամբ Ադրբեջանի հնարավոր ագրեսիայի կանխարգելմանը։ Նա այս տեսակետը հայտնել է՝ անդրադառնալով առաքելության մանդատը ևս երկու տարով երկարաձգելու որոշմանը, հայտնում է Արմենպրեսը։

Շվեդ պատգամավորը մտահոգություն է հայտնել այն կապակցությամբ, որ Ադրբեջանի նախագահ Իլհամ Ալիևը շարունակում է օգտագործել ռազմատենչ հռետորաբանություն Հայաստանի նկատմամբ։

«Կարծում եմ՝ սա (խմբ․ ՀՀ-ում ԵՄ դիտորդական առաքելության մանդատի երկարաձգումը) շատ դրական է։ Ցավալիորեն, Բաքուն կրկին ու կրկին շատ ագրեսիվ հռետորաբանություն է օգտագործում Երևանի դեմ։ Ալիևը (խմբ․ Ադրբեջանի նախագահ), կարծես, հեռու չէ նոր պատերազմ սկսելուց։ Հուսով ենք, որ ԵՄ առաքելությունը կարող է օգնել՝ կանխելու դա»,- նշել է շվեդ պատգամավորը։

Նա անդրադարձել է նաև այն քննադատություններին, որոնք Բաքուն մշտապես հնչեցնում է Հայաստանում ԵՄ առաքելության գործունեության վերաբերյալ՝ հիշեցնելով, որ հենց Ադրբեջանի իշխանություններն են հրաժարվել իրենց տարածքում ԵՄ դիտորդների տեղակայումից։ Պատգամավորը անհիմն է համարել նաև Ադրբեջանի այն պնդումները, թե Հայաստանում ԵՄ դիտորդները լրտեսական գործունեություն են իրականացնում հայ-ադրբեջանական սահմանին։

«Եվրոպական միությունը կնախընտրեր, որ կարողանար աշխատել երկու կողմերում էլ (խմբ․ Հայաստանի և Ադրբեջանի տարածքներում), սակայն Բաքուն հրաժարվել է դրանից: Պնդումները, թե առաքելությունում ինչ-որ լրտեսներ են, անհեթեթ են։ Առաքելությունը շատ թափանցիկ է, և նույնիսկ նախապես տեղեկացնում է, թե որտեղ է իրականացնելու պարեկությունը»,- ընդգծել է պատգամավորը։

Խոսելով Բաքվի դժգոհությունների ու նման հայտարարությունների իրական նպատակի մասին՝ Էրիկ Հելսբորնը նշել է․ «Հարցը, որն այս պարագայում պետք է տալ, այն է, թե Բաքուն ի՞նչից է վախենում, վախենում է, որ ԵՄ-ն ի՞նչ կտեսնի»։

Շվեդ պատգամավորը նաև արձագանքել է դիտարկմանը, որ Ադրբեջանի նախագահ Իլհամ Ալիևը պահանջել է հեռացնել ԵՄ դիտորդներին հայ-ադրբեջանական սահմանից, իսկ Հայաստանի վարչապետ Նիկոլ Փաշինյանը պատասխանել է, որ Բաքվին առաջարկվել է դիտորդներին հետ քաշել արդեն սահմանազատված հատվածներից։ Այդուհանդերձ, Հելսբորնը Երևանին խորհուրդ է տվել չսահմանափակել ԵՄ առաքելության մանդատը։

«Իհարկե, այս հարցերը որոշում են վարչապետ Փաշինյանն ու Հայաստանի խորհրդարանը, բայց ես խորհուրդ կտայի չսահմանափակել առաքելությունների մանդատը։ Առաքելության անդամները գիտեն, թե ինչ են անում և կարողանում են տեղեկացված որոշում կայացնել, թե որտեղ է պարեկություն իրականացնելու լավագույն վայրը»,- եզրափակել է նա։

ՀՀ–ում ԵՄ առաքելության մանդատը երկարացվել է 2 տարով՝ մինչև 2027–ի փետրվար։