«Կասկադ մշակութային հանգույց» ճարտարապետական նախագծի իրականացման համար 20 մլրդ 46 մլն դրամի ներդրում կարվի. կայացել է իրավունքի շնորհման բաց մրցույթը: Հաղթողը 4 ընկերություններից բաղկացած կոնսորցիում է, որի անունից հանդես է գալու «Ջի Թի Բի դիվելոփմենթ» ՍՊԸ-ն։

Նախագիծն ամբողջությամբ նախատեսվում է ավարտել 5 տարում, հայտնում է քաղաքապետարանը։

Ծրագիրը նախատեսում է «Կասկադ» համալիրի անավարտ հատվածի կառուցում՝ ապահովելով մշակութային կոթողի ամբողջական, ավարտուն տեսքը և համալիրի կապը Հաղթանակի 50-ամյակի հուշարձանի հետ: Աշխատանքներն իրականացվելու են ֆրանսիացի հեղինակավոր ճարտարապետ Ժան-Միշել Վիլմոտի ներկայացրած էսքիզի և դրանից բխող նախագծի հիման վրա:

Կստեղծվեն մոտ 1000 հոգու համար նախատեսված համերգասրահ, ժամանակակից արվեստի նոր թանգարան, արվեստանոցներ, ժամանցի և հանգստի գոտիներ: Կառուցված բոլոր շինությունները, որոնք հագեցած են լինելու տեխնիկական անհրաժեշտ միջոցներով ու ենթակառուցվածքներով, ծրագրի ավարտին փոխանցվելու են համայնքին՝ որպես համայնքային սեփականություն:

«Կասկադ» համալիրի վերակառուցման աշխատանքներին զուգահեռ ներդրող ընկերությանը հնարավորություն է տրվելու «Կասկադի» աջակողմյան հատվածում կառուցել բազմագործառութային համալիր, որի նախագիծը կկազմի և ճարտարապետական լուծումները կտա Ժան-Միշել Վիլմոտը՝ համալիրի և «Կասկադի» գոյություն ունեցող ու վերակառուցվող հատվածների և առկա միջավայրի միջև ներդաշնակությունն ապահովելու անհրաժեշտությունը հաշվի առնելով:

Քաղաքապետ Տիգրան Ավինյանը, անդրադառնալով հարցին, ասել է, որ ֆինանսական դժվարությունների պատճառով անավարտ մնացած Կասկադի վերին հատվածը «մնացել էր չկառուցված, դատարկ, աղբահավաքման կենտրոն», հայտնում է Panorama.am-ը։

Նրա խոսքով՝ այս հատվածի զարգացման համար տարբեր ֆորմատներով քննարկվել են մի շարք նախագծեր։

«Մի բանում համոզվել եմ, որ Կասկադ համալիրի վերաբերյալ ճարտարապետական հանրույթի միջև չկա մեկ կարծիք, կոնսենսուսային լուծում և դա է եղել պատճառը, որ երկու միջազգային նախագծերը դրվել են հանրային քվեարկության»,- նշել է Ավինյանը՝ հավելելով, որ նախագծերից մեկը պատկանել է Դևիդ Հոթսենին, իսկ մյուսը՝ Ժան Միշել Վիլմոտին։

Քաղաքապետի փոխանցմամբ՝ քվեարկության արդյունքում հաղթող է ճանաչվել Ժան Միշել Վիլմոտի նախագիծը, որը ներկայացվել է մրցույթի։

Ավինյանը նաև նշել է, որ այս հատվածի կառուցման համար Երևանի քաղաքապետարանը ֆինանսական միջոցներ չի հատկացնելու, քանի որ շինարարությունը կիրականացվի քաղաքապետարանի համար, իսկ հետագայում տարածքները կտրամադրվեն կառուցապատման նպատակով։

Բացի այդ, քաղաքապետը հայտնել է, որ շինարարական աշխատանքներն իրականացվելու են ամբողջ ծավալով: