Չինական DeepSeek-ն ԱԲ–ի նոր մոդելը սպասվածից շուտ կգործարկի

Չինական DeepSeek-ն ԱԲ–ի նոր մոդելը սպասվածից շուտ կգործարկի

PanARMENIAN.Net - Վերջերս միջազգային ֆինանսական շուկաներում մեծ արձագանք առաջացրած չինական ստարտափը, որը ներկայացրել էր մատչելի, բայց արդյունավետ ԱԲ մոդել, նախատեսում է զարգացնել իր հաջողությունը։ DeepSeek ընկերությունն արագացնում է իր նոր R2 մոդելի գործարկումը։

Ըստ DeepSeek-ի ծրագրերին ծանոթ երեք աղբյուրների՝ Հանչժոուում ընկերությունն ակտիվացրել է աշխատանքները R1-ի հաջորդի թողարկման ուղղությամբ։ Նախապես R2-ը նախատեսված էր թողարկել մայիսի սկզբին, սակայն այժմ ընկերությունը ձգտում է ներկայացնել այն հնարավորինս շուտ։ Ակնկալվում է, որ նոր մոդելը կունենա ավելի բարձրակարգ կոդավորման կարողություններ և կկարողանա տրամաբանական վերլուծություն կատարել ոչ միայն անգլերեն, այլև այլ լեզուներով, գրում է Delo.ua-ն։

Մինչդեռ DeepSeek-ի մրցակիցները դեռևս փորձում են հարմարվել R1-ի թողարկման հետևանքներին։ Ընկերության առաջին մոդելը հիմնված էր համեմատաբար թույլ Nvidia չիպերի վրա, սակայն այնուամենայնիվ դարձավ լուրջ մրցակից ամերիկյան տեխնոլոգիական հսկաների մոդելներին, որոնց մշակման համար ծախսվել էին հարյուր միլիարդավոր դոլարներ։

«DeepSeek-ի R2 մոդելի գործարկումը կարող է շրջադարձային կետ դառնալ ԱԲ արդյունաբերության համար։ DeepSeek-ի հաջողությունը տնտեսապես արդյունավետ ԱԲ մոդելների ստեղծման հարցում, հավանաբար, կհանգեցնի նրան, որ ամբողջ աշխարհում ընկերությունները կշտապեն արագացնել սեփական նախաձեռնությունները... կոտրելով այս ոլորտում գերիշխող մի քանի խաղացողների մենաշնորհը», — ասել է Վիջայասիմհա Ալիլը։

Վերլուծաբանների կարծիքով՝ R2-ի հայտնվելը կարող է մտահոգություն առաջացնել ԱՄՆ կառավարության շրջանում, որը ԱԲ-ի ոլորտում առաջնորդությունը դիտարկում է որպես ազգային առաջնահերթություն։ Միևնույն ժամանակ, սա կարող է խթանել Չինաստանի իշխանությունների և ընկերությունների ակտիվությունը. արդեն տասնյակ չինական ընկերություններ հայտարարել են, որ սկսել են իրենց արտադրանքում ինտեգրել DeepSeek-ի մոդելները։

Նույնիսկ մինչ R1-ի համաշխարհային ճանաչում ձեռք բերելը, DeepSeek-ն արդեն գրավել էր Պեկինի ուշադրությունը։ Չինական ընկերություններն ու պետական կառույցները սկսել են այն կիրառել աննախադեպ արագությամբ։ Առնվազն 13 քաղաքային վարչակազմեր և 10 պետական էներգետիկ ընկերություններ հայտնել են, որ իրենց համակարգերում ներդրել են DeepSeek-ի տեխնոլոգիաները։

«Եթե DeepSeek-ը դառնա Չինաստանի պետական կառույցներում լայնորեն կիրառվող ԱԲ մոդել, ապա արևմտյան կարգավորիչները կարող են դա համարել ևս մեկ պատճառ՝ խստացնելու ԱԲ չիպերի կամ ծրագրային ապահովման ոլորտում համագործակցության սահմանափակումները»,–կարծում է Սթիվեն Վուն, արհեստական բանականության փորձագետ և Carthage Capital հեջ ֆոնդի հիմնադիրը։

Փետրվարի 7-ին հաղորդվել էր, որ DeepSeek-ը ժամանակավորապես սահմանափակել է իր հարթակի հասանելիությունը սերվերների գերբեռնվածության պատճառով և հայտարարել է սակագների բարձրացման մասին։

 Ուշագրավ
Այդ մասին նա գրել է ֆեյսբուքյան իր էջում
Համաժողովը Երևանում է անցկացվել նաև 2019-ին
Այդ մասին ասել է հարթակի հիմնադիր Պավել Դուրովը
Արա Խաչատրյանը գլխավոր տնօրենի պաշտոնը ստանձնել էր 2020 թվականի ապրիլից
---