Էլեկտրամոբիլների մաքսատուրքի արտոնության քվոտան բաշխվել է երկու խմբի միջև

PanARMENIAN.Net - ՊԵԿ-ը հրապարակել է տվյալներ այն մասին, թե ինչպես է իրականացվել էլեկտրամոբիլների ներմուծման մաքսատուրքի արտոնության բաշխումը 2025 թվականին։

ՀՀ Պետական եկամուտների կոմիտեն հայտնել է, որ Եվրասիական տնտեսական հանձնաժողովի խորհրդի 2023թ. նոյեմբերի 24-ի N 134 որոշմամբ՝ ԱՏԳ ԱԱ 8703 80 000 2 ծածկագրով էլեկտրական շարժիչով տրանսպորտային միջոցների համար 2025 թվականին սահմանվել է 8000 հատ ներմուծման մաքսատուրքի 0% արտոնությամբ ձևակերպելու քվոտա։ Այս քվոտան ՀՀ Կառավարության 2024թ. նոյեմբերի 28-ի N 1876-Ն որոշմամբ բաշխվել է հետևյալ սկզբունքով.

3000 հատից ոչ ավելի էլեկտրական մեքենաներ կարող են ներմուծվել անմիջապես ավտոարտադրողների հետ կնքված դիլերական-դիստրիբյուտորական պայմանագրերի շրջանակում գործող ներմուծողների կողմից։

5000 հատից ոչ ավելի էլեկտրամոբիլներ նախատեսված են այն ներմուծողների (այդ թվում՝ ֆիզիկական անձանց) համար, որոնք չեն մտնում առաջին խմբի մեջ։

Կոմիտեն տեղեկացնում է, որ 2025 թ. մարտի 2-ը ներառյալ մաքսատուրքի արտոնությամբ ձևակերպվել է.

1. 466 հատը կամ բաշխված քվոտայի (3000 հատ) 15.5%-ը` անմիջապես ավտոարտադրողի հետ կնքված դիլերական-դիստրիբյուտորական պայմանագրի շրջանակներում ներմուծում իրականացնող սուբյեկտների կողմից:
2. 4818 հատը կամ բաշխված քվոտայի (5000 հատ) 96.4%-ը` 1-ին կետում չնշված ներմուծում իրականացնող սուբյեկտների կողմից: