Reddit-ի համահիմնադիր Ալեքսիս Օհանյանը TikTok-ի ամերիկյան մասնաճյուղի հավանականգնորդների շարքում է` որպես սոցիալական մեդիայի ոլորտում մասնագիտացած ռազմավարական խորհրդատու: Այդ մասին հայտնել է գործարար Ֆրենք ՄըքՔորթը։
Օհանյանը համարվում է համացանցային բիզնեսի առաջամարտիկներից մեկը։ Նա Վիրջինիայի համալսարանում իր համակուրսեցու հետ հիմնել է Reddit հարթակը, որը 2006-ին վաճառել է Conde Nast-ին։ Ավելի ուշ՝ 2014-ին, կրկին վերադարձել է ընկերություն՝ որպես գործադիր տնօրեն՝ խթանելու դրա հետագա զարգացումը, հայտնում է «Ամերիկայի ձայնը»։
Տարիների ընթացքում Օհանյանը ներդրումներ է իրականացրել մի շարք տեխնոլոգիական ստարտափներում, որոնց թվում են Instacart-ը, Patreon-ը և OpenSea-ն։
«Նա մեծ փորձ ունի…, թե որտեղ էր սոցիալական մեդիան և, թե ուր է այն հասնելու»,- նշել է ՄըքՔորթը։
ՄըքՔորթի փոխանցմամբ՝ Օհանյանը կնպաստի Project Liberty-ի առաջարկի ամրապնդմանը, որն ուղղված է TikTok-ի ամերիկյան ակտիվների ձեռքբերմանը։ Այս նախագիծը ՄըքՔորթը համարում է «ժողովրդի հայտ», քանի որ նպատակ ունի հարթակը կառուցել այնպիսի տեխնոլոգիայի հիման վրա, որը հնարավորություն կտա օգտատերերին վերահսկել իրենց տվյալների օգտագործման և տարածման գործընթացը։
«Նա կարող է օգնել՝ ապացուցելու, որ մեր գործն արդյունավետ է, և աջակցել գործի սոցիալականացմանը»,- նշել է ՄըքՔորթը:
Օհանյանը, իր հերթին, հայտնել է, որ ոգևորված է այս նախագծում ներգրավվածությամբ և ցանկանում է ապահովել, որ մարդիկ ավելի մեծ վերահսկողություն ունենան իրենց անձնական տվյալների նկատմամբ։
TikTok-ի հնարավոր գնորդների շարքում են նաև այլ ներդրողներ, այդ թվում՝ Ջեսսի Թինսլիի գլխավորած խումբը, որի կազմում են YouTube-յան հայտնի բլոգեր MrBeast-ը (Ջիմի Դոնալդսոնը) և ձեռնարկատեր Ռեյդ Ռասները։
ՄըքՔորթը հայտնել է, որ Սպիտակ տուն է ներկայացրել TikTok-ի գնման վերաբերյալ մանրամասն զեկույց, որը ներառում է ֆինանսական կարողությունների, տեխնոլոգիական մոտեցումների և ազգային անվտանգության հարցերի վերաբերյալ տվյալներ։
TikTok-ի ձեռքբերման հարցը շարունակում է մնալ քննարկման փուլում։ Չի բացառվում, որ ByteDance-ը, որը TikTok-ի սեփականատերն է, կդադարեցնի հավելվածի գործունեությունը ԱՄՆ-ում՝ այն վաճառելու փոխարեն, ինչը կարող է ազդել միլիոնավոր ամերիկացի օգտատերերի վրա։
