Հայաստանի կրթության, գիտության, մշակույթի և սպորտի նախարարությունը համագործակցում է իտալացի վերականգնող մասնագետների հետ՝ Գառնիի հնագույն բաղնիքը վերականգնելու նպատակով։ Նախարարության նախաձեռնությամբ պետական ֆինանսավորմամբ պատվիրվել է վերականգնման նախագիծ։

2019 թվականին իտալացի վերականգնող ճարտարապետ Լուչիո Սպեկայի կողմից մշակվել և նախարարություն է ներկայացվել «Գառնիի բաղնիքի արժևորման և վերականգնման նախագիծ»։ Այդ նախագծով նախատեսվում է խճանկարի ամրացում և վերականգնում, ինչպես նաև ծածկի փոխարինում՝ ժամանակակից ճարտարապետական լուծումներով։

Հաշվի առնելով Գառնիի տաճարի և բաղնիքի պատմական կարևորությունը, ինչպես նաև նախագծի հեղինակի առաջարկած մեթոդաբանությունը, նախարարությունը բանակցություններ է վարել իտալական կողմի հետ։ 2024 թվականին, Իտալիայի դեսպանության աջակցությամբ, պայմանավորվածություն է ձեռք բերվել խճանկարի վերականգնման աշխատանքներն իրականացնելու՝ «L’Opificio delle Pietre Dure» ինստիտուտի կողմից։ Այս կառույցը Իտալիայի մշակույթի նախարարության մասնագիտացված հաստատությունն է, որը զբաղվում է մոնումենտալ արվեստի հետազոտմամբ և վերականգնմամբ։

2024 թվականին նշված ինստիտուտի մասնագետները Գառնիում իրականացրել են չափագրական ուսումնասիրություններ։ 2025 թվականի ապրիլ-մայիս ամիսներին նախատեսվում է նրանց նոր այց՝ հետագա ուսումնասիրությունների և փորձանմուշների վերցման նպատակով։ Խճանկարի վերականգնման և ծածկի փոխարինման աշխատանքները կմեկնարկեն 2025 թվականին։