Առողջապահության նախարարությունն, արձագանքելով մամուլում տարածված տեղեկություններին կապված դեղատներից որոշ դեղերի հետկանչի հետ, պարզաբանել է, որ դեղերի հետկանչի միակ պատճառը փաստաթղթային անճշտությունն է։

Հայտարարության մեջ նշվում է, որ տվյալ թերությունը որևէ ազդեցություն չունի մարդու առողջության վրա, քանի որ այն չի առնչվում դեղամիջոցների որակին, անվտանգությանը կամ արդյունավետությանը։

«Պաշտոնապես հայտնում ենք՝ այդ դեղերի հետկանչը կապված չէ որակի հետ և ովքեր, որ արդեն դեղատներից ձեռք էին բերել ու օգտագործել այդ դեղերից, անհանգստանալու որևէ առիթ չունեն․ դրանք ոչ միայն անվտանգ են առողջության համար, այլ՝ չկա նաև որևէ խնդիր արդյունավետության հետ կապված։ Հետկանչի միակ պատճառն ու հիմքը փաստաթղթային անճշտությունն է։

«Դեղերի մասին» ՀՀ օրենքի համաձայն՝ դեղերի գրանցման հավաստագրի իրավատերը պարտավոր է ապահովել գրանցված արտադրանքի անվտանգությունը, արդյունավետությունը և որակը։ Այս պահանջի շրջանակում՝ «Մերկ» ՍՊԸ-ն՝ որպես մի շարք դեղերի գրանցման հավաստագրի իրավատեր, տեղեկացրել է, որ որոշ միջնորդ կազմակերպությունների կողմից ներմուծված դեղերի հավաստագրերում առկա են անհամապատասխանություններ՝ իր տրամադրած բնօրինակ փաստաթղթերի հետ։

Այս տեղեկատվության հիման վրա առողջապահության նախարարությունը կատարել է փոփոխություններ դեղերի ներմուծման և համապատասխանության հավաստագրման գործընթացում։ Հատկապես՝ ընդլայնվել են փորձաքննության մեխանիզմները, այդ թվում՝ ակտիվ համագործակցությունը գրանցման հավաստագրի իրավատերերի և արտահանող երկրների պատկան մարմինների հետ։ Այս գործընթացի ընթացքում անհրաժեշտություն է առաջացել դադարեցնել որոշ դեղերի շրջանառությունը և նախաձեռնել դրանց հետկանչը»,- նշված է նախարարության հայտարարության մեջ։