Սոցիալական մեդիայում տարածվում է ՀՀ վարչապետ Նիկոլ Փաշինյանի՝ թուրքական լրատվամիջոցներին տված հարցազրույցից մի դրվագ, որում նա իբր խոսում է թուրքերեն։

«Փաստերի ստուգման հարթակը» (FIP) հատուկ գործիքի միջոցով պարզել է, որ սոցցանցերում տարածվող կարճ տեսանյութում Փաշինյանին վերագրվող՝ թուրքերեն խոսքը, որում Փաշինյանը կարևորում է հայ-թուրքական երկխոսությունը, գեներացվել է արհեստական բանականության միջոցով, փաստացի այն deep fake է։

Տեսանյութը հրապարակվել է Ինստագրամում և արդեն հավաքել է ավելի քան 750,000 դիտում։ Սակայն իրականում Փաշինյանի հարցազրույցը թուրքական լրատվամիջոցներին, որը տեղի է ունեցել մարտի 13-ին, ամբողջությամբ անցկացվել է հայերենով։

FIP-ը նշում է, որ տեսանյութում Փաշինյանի խոսքի արտաբերման ճշգրտությունը և շուրթերի համընկնումը ստեղծում են բնական տպավորություն, սակայն վարչապետը նման խոսք երբեք չի արտաբերել։

Բացի այդ, FIP-ի հաղորդմամբ, Փաշինյանն իր քաղաքական գործունեության ընթացքում երբևէ թուրքերենով հարցազրույց չի տվել կամ հրապարակային հայտարարություն չի արել։