Հաջիզադեն «հերքել է» Բաքվի նոր պայմանների մասին Երևանի պնդումը՝ պահանջելով անհապաղ փոխել ՀՀ սահմանադրությունը

PanARMENIAN.Net - Ադրբեջանի ԱԳՆ-ի մամուլի խոսնակ Այհան Հաջիզադեն «հերքել է» Հայաստանի արտգործնախարար Արարատ Միրզոյանի հայտարարությունները Բաքվի կողմից խաղաղ համաձայնագրի ստորագրման համար նոր պայմանների առաջադրման մասին և անմիջապես պահանջել է «անհապաղ փոխել ՀՀ սահմանդրությունը»:

Ըստ նրա՝ նոր պայմաններ առաջ քաշելու մասին Միրզոյանի հայտարարությունն անհիմն է, գրում է ՏԱՍՍ-ը:

Նա նշել է, որ հայկական կողմի նման հայտարարությունները նպատակ ունեն «մոլորեցնել միջազգային հանրությանը և չեն հանգեցնի ցանկալի արդյունքի»։

«Եթե Հայաստանը շահագրգռված է խաղաղ համաձայնագրի ստորագրմամբ, ապա պետք է անհապաղ փոփոխություններ կատարի իր Սահմանադրության մեջ և չխուսափի համագործակցությունից՝ Մինսկի խմբի պաշտոնական լուծարման ուղղությամբ»,- հավելել է Ադրբեջանի ԱԳՆ ներկայացուցիչը։

Հաջիզադեն ընդգծել է, որ վերջին երկուսուկես տարվա ընթացքում բազմիցս բարձրացվել է Հայաստանի Սահմանադրությունից , ինչպես նաև ԵԱՀԿ Մինսկի խմբի լուծարման հարցը։ Նրա խոսքով՝ այս դիրքորոշումը փոխանցվել է հայկական կողմին դեռևս 2023 թվականի մայիսին Վաշինգտոնում կայացած հանդիպման ժամանակ և հայտնի է նաև երրորդ երկրներին։

Վարչապետ Նիկոլ Փաշինյանը մի քանի անգամ հայտարարել է, որ Հայաստանի և Ադրբեջանի միջև խաղաղության համաձայնագրի նախագիծն արդեն համաձայնեցված է և սպասում է վերջնական ստորագրման։ Նա նշել է, որ Ադրբեջանի նախագահին առաջարկում է նախաձեռնել խորհրդակցություններ համաձայնագրի համաձայնեցված նախագծի ստորագրման շուրջ։

Մարտի 13–ին ՀՀ ԱԳՆ–ն հայտարարել է, որ ընդունել է չհամաձայնեցված 2 հոդվածի վերաբերյալ ադրբեջանական կողմի առաջարկները և որ Խաղաղության համաձայնագիրը պատրաստ է ստորագրման: Նշվում է, որ ՀՀ–ն պատրաստ է խորհրդակցություններ սկսել համաձայնագրի ստորագրման ժամկետների և տեղի շուրջ։ Բաքվից առաջ են քաշել նոր նախապայմաններ և հայտարարել, թե դեռ վաղ է խոսել հանդիպման ժամկետների մասին: