Առաջին տիպի դիաբետով երեխաներ ունեցող ընտանիքները հայտնել են, որ արդեն երեք ամիս է՝ պոլիկլինիկաները չեն տրամադրել անհրաժեշտ ինսուլինը, նովոռապիդը և շաքարի մակարդակի չափման թեստ երիզները, բացի դրանից՝ կասեցվել է նաև այդ երեխաների համար նախատեսված թոշակը։ Այս հարցերով 11 ծնող հանդիպում է ունեցել Առողջապահության նախարար Անահիտ Ավանեսյանի և մի շարք այլ պաշտոնյաների հետ՝ իրենց պահանջները ներկայացնելու նպատակով։

Հանդիպմանը ներկա ծնողներից Ալինա Աղաջանյանն ասել է, որ իրենք դեռ լիարժեք պատասխաններ չեն ստացել, ուստի սպասվում են նոր հանդիպումներ, գրում է Aravot.am-ը:

«Շատ բաներ դեռ բարձրաձայնվելու են, որովհետեւ սա մեր առաջին կամ վերջին հանդիպումը չէ, դեռ այլ հանդիպումներ ունենալու ենք: Օրինակ, ես ինչ հարցով եկել էի, դրանից բան չհասկացա, խոսքը ֆունկցիոնալությանը, թոշակը կտրելուն, հաշմանդամության կարգը հանելուն է վերաբերվում: Նույնիսկ բարձրաձայնվեց այն խնդիրը, որ կամ բոլորի ֆունկցիոնալության հարցը դատարանով վերականգնվի, կամ բոլորի թոշակները կտրվեն»,-ասել է նա:

Նրա խոսքով՝ հանդիպման ընթացքում բարձրաձայնվել է նաև այն հարցը, որ 18 տարին լրացած անձանց գոնե հնարավորություն տրվի անվճար բուժօգնություն ստանալ հիվանդանոցներում՝ մնալով մասնագետների վերահսկողության ներքո, ինչպես դա նախկինում արվել է Մուրացանի հիվանդանոցում՝ իրականացնելով հետազոտություններ, անալիզներ, էխոսրտագրություններ ու բուժզննում՝ առանց վճարի։

«Մուրացան» համալսարանական հիվանդանոցի էնդոկրինոլոգիայի կլինիկայի ղեկավար Ելենա Աղաջանովան էլ ասել է, որ լավ կլինի, եթե գոնե 3 օր երեխաները հնարավորություն ունենան ստացիոնարում լինելու»,- նշել է մեր զրուցակիցը։

Ծնողը հավելել է, որ թոշակն էական նշանակություն ունի՝ հատկապես սոցիալապես խոցելի խմբերի համար, քանի որ շատ ծնողներ միայնակ են, կան ընտանիքներ, որոնք միայն նպաստով են գոյատևում։

«Երեխաներին տրվող թոշակը շատ մեծ նշանակություն ունի, որովհետեւ այդ թոշակով ոսկի առնելու չես գնում, այդ թոշակով կարող ես հաց առնել: Բոլոր մայրիկներով միմյանց ճանաչում ենք, մի տնից չենք, մի հալի ենք, բոլորս ունենք նույն խնդիրները, կան միակողմանի ծնողազուրկ երեխաներ, միայնակ մայրեր, թոշակառուներ, նպաստառուներ, այդ գումարով կազինո չէինք խաղալու: Այդ գումարով երեխաները գոնե կարող են թեսթ երիզներ գնել ու չափել իրենց շաքարը, կարող են հաց գնել, կարող է դա որպես ճանապարհածախս ծառայել, որովհետեւ նրանց մեջ ուսանողներ կան: Եթե անգամ հնարավորություն ունենան հիվանդանոցում պառկելու, այդ գումարը միեւնույն է ՝ մեծ նշանակություն ունի»,-ասել է նա: