Մարտի 30-ին՝ ժամը 15:00-ի սահմաններում ընտրական իրավախախտում կատարելու կասկածով Գյումրիում ձերբակալվել է չորս քաղաքացի, որոնցից երեքը 70-անց, 80-անց ու 90-անց կանայք, սակայն մինչև ժամը 22:20-ն իրավապահները թույլ չեն տվել փաստաբաններին այցելել նրանց,ինչը, ըստ իրավապաշտպանների, հակասում է օրենքի պահանջներին։ Այդ մասին հայտնել է «5 իրավապաշտպանների նախաձեռնությունը»։

«Փաստում ենք, որ իրավապահների վարքագիծը ոչ միայն ապօրինի է, այլև ընդգծված քաղաքական, քանի որ առերևույթ նպատակ է հետապնդում ուշացնելու ՔՊ-ի քարոզչական թեզերի հերքումը։ Ինչ վերաբերում է հարցի բարոյական կողմին, ապա դրան անդրադառնալը նույնիսկ ավելորդ է»,–ասվում է հայտարարության մեջ։

Փաստաբան Արսեն Բաբայանը ֆեյսբուքյան իր էջում հայտնել է, որ ՄԻՊ աշխատակազմի արագ արձագանքման ջանքերի շնորհիվ հաջողվել է պարզել Գյումրիի «Մեր քաղաքը» նախընտրական դաշինքի ավագանու թեկնածու Անահիտ Խալաթյանի գործով քննիչի ով լինելը։

«ՄԻՊ աշխատակազմի արագ արձագանքման միջամտությամբ, վերջապես, հաջողվեց գտնել Գյումրիի «Մեր քաղաքը» նախընտրական դաշինքով ավագանու թեկնածու Անահիտ Խալաթյանի քննիչին»,–գրել է նա։

Ըստ Բաբայանի՝ այժմ «արդեն տիկին Անահիտին տեղափոխել են ՁՊՎ», և ինքն այժմ սպասում է համապատասխան գրությանը քննիչի կողմից՝ այցելելու համար։

Փաստաբանը հավելել է, որ նպատակ ունի անձամբ տեսակցել 70-ամյա ձերբակալված կնոջը՝ նշելով. «Հիմա սպասում եմ՝ քննիչը համապատասխան գրություն տա, որպեսզի գնամ տեսնելու ձերբակալված 70 տարեկան կնոջը»։

ԿԸՀ-ն ամփոփել է մարտի 30–ին կայացած ՏԻՄ արտահերթ ընտրությունների նախնական արդյունքները, որոնց համաձայն Գյումրիում ոչ մի ուժի չի ստացել մեծամասնության քվեն։ Համայնքի ղեկավար ընտրելու համար քաղաքական կոալիցիաներ կազմելու անհրաժեշտություն կառաջանա։Եթե ընդդիմադիր ուժերը միավորվեն, Գյումրին կունենա ընդդիմադիր քաղաքապետ։

Փարաքարում ընտրություններին մասնակցել է 4 քաղաքական ուժ՝ «Քաղաքացիական պայմանագիր» (Լյուդվիգ Գյուլնազարյան), «Միասնություն» դաշինք (Վալոդյա Գրիգորյան), «Ազգային առաջընթաց» կուսակցություն (Դավիթ Մինասյան) և «Կայունություն» կուսակցություն (Գոռ Սարիբեկյան)։ Առաջատարը «Միասնություն» դածինքն է, որի մաս կազմող «Ապրելու երկիր» կուսակցությունը հայտնել է իր թեկնածուի՝ Վալոդյա Գրիգորյանի հաղթանակի մասին։