Զոհրաբյան․ Կարծես նորից Հայկը հաղթել է Բելին

PanARMENIAN.Net - Հասարակական-քաղաքական գործիչ Նաիրա Զոհրաբյանը ֆեյսբուքյան իր էջում, անդրադառնալով ՏԻՄ ընտրությունների նախնական արդյունքներին Գյումրիում ու Փարաքարում, կարևորել է այն հանգամանքը, որ ժողովրդի հաղթանակը կարող է վերացնել հասարակության մեջ ձևավորված բաժանարար գծերը։

«Կարծես նորից Հայկը հաղթել է Բելին, հայը՝ թուրքին

Երեկ Փարաքար համայնքում «Ապրելու Երկիրը» ջախջախեց Նիկոլի կուսակցությանը։ Գյումրիում, չնայած գործադրված խայտառակ վարչական ռեսուրսին, ահաբեկումներին, մարդ գողանալուն, ըստ լուրերի՝ ջավախքեցիների բերել-գրանցելով, Նիկոլի Սարիկը քաղաքապետ չի դառնա։

Ի դեպ, Գյումրիում Սարիկի ստացած ձայնեը ՔՊ-ի հետ որեւէ կապ չունեն. դրանք հե՛նց Սարիկի ձայներն են՝ պլյուս՝ կատաղի, վայրենաբարո, գազազած վարչական ռեսուրսը»,–գրել է նա։

Նրա դիտարկմամբ՝ եթե վարչապետ Նիկոլ Փաշինյանը փորձի կրկնել Վանաձորում կիրառված սցենարը՝ բարձրաձայն հայտարարություններով, սպառնալիքներով, ընդդիմադիր ավագանու ներկայացուցիչների հնարավոր առևանգումներով կամ Վարդան Ղուկասյանի կալանավորմամբ, որևէ բան չի փոխի, քանի որ նա արդեն պարտվել է։

«Պարտված է, որովհետեւ էն ցնծությունը, էն բերկրանքը, որով մարդիկ Փարաքարում և Գյումրիում շնորհավորում էին իրար, էդպես լինում է, երբ հայը հաղթում է իր գենետիկ թշնամում, երբ հայը հաղթում է իր տունը քանդածին, երբ հայը հաղթում է իր ապագան խլածին, երբ հայը հաղթում է իր երեխային սպանածին։ Ինձ համար, անկեղծ, ամենակարևորը հենց է՛դ արժանապատվության հաղթանակն էր, հույսի վերադարձի հաղթանակն էր։ Տպավորություն էր՝ որ ևս մեկ անգամ Հայկը հաղթել է Բելին, ու հայը հաղթել է թուրքին, որովհետեւ էդպես ցնծում են միայն թշնամուն հաղթելիս, էդպես ցնծում են միայն քո հայրենիքը թուրքի փայ սարքողին հաղթելիս»,–գրել է նա։

Նա նաև կարևորել է այն հանգամանքը, որ ժողովրդի հաղթանակը կարող է վերացնել հասարակության մեջ ձևավորված բաժանարար գծերը, որոնք տարիներ շարունակ խորացվել են իշխող վարչակազմի վարած քաղաքականությամբ։

«Եվ որ շատ կարեւոր էր, Նիկոլի բերած ատելությունը, ինչի թմրասեղին ինքը 18-ից նստեցրել էր հասարակությանը, հայր ու որդի էր իրար դեմ հանել, տներ էր քանդել, Նիկոլի ու նիկոլիզմի հանդեպ հաղթանակը սկսում է վերացնել նաև հանրային թշնամանքը։ Որովհետեւ թշնամու հանդեպ հաղթանակը, իսկ Նիկոլը թշնամի է, միավորում է ժողովրդին»,–ասվում է Զոհրաբյանի գրառման մեջ։

Զոհրաբյանը եզրափակել է իր միտքը՝ ընդգծելով, որ Փաշինյանը կարող է որքան ուզենա հանդես գալ հրապարակային գրառումներով՝ իրեն ներկայացնելով որպես ժողովրդավարության օրինակ, սակայն դա այլևս չի կարող փոխել փաստը, որ նա պարտություն է կրել։

«Ապրելու երկիր» կուսակցության նախագահ Մանե Թանդիլյանը, անդրադառնալով Փարաքարի ավագանու ընտրություններում կուսակցության հաղթանակին, ֆեյսբուքյան իր էջում գրել էր, որ Փարաքար համայնքի ավագանու ընտրություններում իրենց թիմը Վալոդյա Գրիգորյանի գլխավորությամբ հաղթել է՝ հավաքելով 57% ձայն։

«Թող որ վերջապես սկիզբ դրվի ՔՊ-ից մեր հայրենիքն ազատագրելու ժամանակաշրջանին»,–գրել է նա։

ԿԸՀ-ն ամփոփել է մարտի 30–ին կայացած ՏԻՄ արտահերթ ընտրությունների նախնական արդյունքները, որոնց համաձայն Գյումրիում ոչ մի ուժի չի ստացել մեծամասնության քվեն։ Համայնքի ղեկավար ընտրելու համար քաղաքական կոալիցիաներ կազմելու անհրաժեշտություն կառաջանա։Եթե ընդդիմադիր ուժերը միավորվեն, Գյումրին կունենա ընդդիմադիր քաղաքապետ։

Փարաքարում ընտրություններին մասնակցել է 4 քաղաքական ուժ՝ «Քաղաքացիական պայմանագիր» (Լյուդվիգ Գյուլնազարյան), «Միասնություն» դաշինք (Վալոդյա Գրիգորյան), «Ազգային առաջընթաց» կուսակցություն (Դավիթ Մինասյան) և «Կայունություն» կուսակցություն (Գոռ Սարիբեկյան)։ Առաջատարը «Միասնություն» դածինքն է, որի մաս կազմող «Ապրելու երկիր» կուսակցությունը հայտնել է իր թեկնածուի՝ Վալոդյա Գրիգորյանի հաղթանակի մասին։