ՊՆ-ն հերքել է Բաքվի իրար հաջորդող ապատեղեկատվությունները

PanARMENIAN.Net - ՀՀ ՊՆ-ն հերքել է Ադրբեջանի ապատեղեկատվությունը, ըստ որի՝ մարտի 31-ին՝ ժամը 11։10-ի սահմաններում, ՀՀ ԶՈւ ստորաբաժանումները կրակ են բացել սահմանագոտու հարավարևելյան ուղղությամբ տեղակայված ադրբեջանական դիրքերի վրա։

«Ադրբեջանի ՊՆ հաղորդագրությունը, թե իբր մարտի 31-ին՝ ժամը 11։10-ի սահմաններում, ՀՀ ԶՈւ ստորաբաժանումները կրակ են բացել սահմանագոտու հարավարևելյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը»,–ասվում է ՀՀ ՊՆ հայտարարության մեջ։

Հայաստանի ՊՆ-ն հերքել է նաև ադրբեջանական կողմի մեկ այլ ապատեղեկատվություն ևս, ըստ որոնց՝ մարտի 31-ի ժամը 17։00-ից մինչև ապրիլի 1-ի ժամը 04։45-ն ընկած ժամանակահատվածում ՀՀ զինված ուժերը կրակ են բացել սահմանի արևելյան ու հարավարևելյան ուղղությամբ տեղակայված ադրբեջանական դիրքերի ուղղությամբ։

Նշվել է նաև, որ ՀՀ վարչապետի աշխատակազմը հանդես է եկել առաջարկով՝ ձևավորելու Հայաստան-Ադրբեջան համատեղ մեխանիզմ, որը կնպաստի թե՛ հրադադարի ռեժիմի խախտումների դեպքերի, թե՛ դրանց վերաբերյալ տեղեկությունների ուսումնասիրությանը, սակայն Ադրբեջանի կողմից այդ առաջարկին որևէ արձագանք դեռ չի ստացվել։

ՀՀ պաշտպանության նախարարությունն ընդգծել է, որ ՀՀ վարչապետի աշխատակազմի դիրքորոշմանը համապատասխան՝ պատրաստ է հետաքննել Ադրբեջանի ՊՆ հաղորդագրությունը հիմնավորող փաստերը՝ դրանք ՀՀ-ին փոխանցելու պարագայում։

Ավելի վաղ, ՊՆ-ն հաղորդել է, որ մարտի 31-ին՝ ժամը 00:50-ի սահմաններում, Ադրբեջանի ԶՈւ ստորաբաժանումները կրակ են բացել Սյունիքի մարզի Խնածախ բնակավայրի ուղղությամբ, ինչի հետևանքով վնասվել է մեկ բնակելի տուն։ ՊՆ-ն հրապարակել է դեպքը հավաստող լուսանկարներ՝ շեշտելով, որ տուժածներ չեն եղել։