Ֆրանսիայի և Մեքսիկայի արտաքին գործերի նախարարությունները ողջունել են այն որոշումը, որով Հայաստանը միացել է ՄԱԿ-ի Անվտանգության խորհրդում զանգվածային վայրագությունների ժամանակ վետոյի իրավունքի սահմանափակման նախաձեռնությանը։ Այդ մասին ասվում է Ֆրանսիայի արտաքին գործերի նախարարության պաշտոնական հայտարարության մեջ։

Հայտարարության մեջ ընդգծվում է, որ այդ քայլը վկայում է Հայաստանի հավատարմությունը արդյունավետ բազմակողմ մոտեցմանը և ՄԱԿ-ի Անվտանգության խորհրդի հնարավորությունների ամրապնդմանն՝ ի նպաստ գործողությունների նմանատիպ ճգնաժամային իրավիճակներում, հայտնում է Factor.am-ը։

Ֆրանսիան, որը ապրիլի 1-ից մեկամսյա ժամկետով ստանձնել է Անվտանգության խորհրդի նախագահությունը, դեռևս 2015 թվականին պարտավորություն է ստանձնել չօգտագործել իր վետոյի իրավունքը զանգվածային վայրագությունների պարագայում։

«Նախաձեռնությանը, որը մենք Մեքսիկայի հետ միասին խթանում ենք նույն թվականից, աջակցում է 107 երկիր։ Այս տարի այն նշելու է իր 10-ամյակը ՄԱԿ-ի Գլխավոր վեհաժողովի 80-րդ նստաշրջանի բարձր մակարդակի շաբաթվա ընթացքում»,-ասվում է հայտարարության մեջ։