ՀՀ-ում գործող բանկերը 2024–ին 6.4 տրլն դրամի վարկ են տրամադրել

2 ապրիլի 2025 - 18:19 AMT

PanARMENIAN.Net - Հայաստանում գործող առևտրային բանկերը 2024 թվականին մոտ 6.4 տրլն դրամ վարկային ֆինանսավորում են տրամադրել, որի զգալի մասը ուղղվել է փոքր և միջին բիզնեսին։

Հայաստանի բանկերի միության նախագահ Դանիել Ազատյանը «ՓՄՁ ոլորտի ֆինանսավորման հնարավորություններն ու հեռանկարները» թեմայով անցկացված համաժողովի ընթացքում նշել է, որ 3.1 տրլն դրամի վարկը ուղղվել է տնտեսության տարբեր ճյուղերին և իրավաբանական անձանց։ Փոքր և միջին ձեռնարկություններին տրամադրվել է 1.6 տրլն դրամի վարկ, հայտնում է Sputnik Արմենիան։

Ազատյանը անդրադարձել է նաև Գերմանա–հայկական հիմնադրամի կողմից իրականացված վարկային ծրագրերին՝ նշելով, որ միայն 2024 թվականին հիմնադրամը ՓՄՁ-ներին տրամադրել է ավելի քան 13 հազար վարկ՝ ընդհանուր 174 մլրդ դրամի ծավալով։

Նրա խոսքով, 1998 թվականից մեկնարկած ծրագրի շրջանակում հիմնադրամը ՓՄՁ սուբյեկտներին հատկացրել է մոտ 880 մլրդ դրամ՝ մոտ 130 հազար վարկի տեսքով։

Ըստ Ազատյանի` միջազգային ֆինանսական հաստատությունների հետ համագործակցությունը մեծ հնարավորություն է ընձեռել հայաստանյան առևտրային բանկերին` ֆինանսական նոր գործիքներ առաջարկելու համար։

«Գլխավոր նպատակն է ապահովել թիրախային ֆինանսավորում և ձևավորել վարկավորման մշակույթ, որտեղ առևտրային բանկերը հանդիսանում են տեղայնացման առանցքային օղակ»,– ընդգծել է նա։

Դանիել Ազատյանը նշել է, որ Միությունը պատրաստ է աջակցել բիզնեսի և բանկային համակարգի երկխոսությանը՝ կազմակերպելով տարբեր միջոցառումներ մարզերում՝ նպաստելով բիզնես միջավայրի բարելավմանը։

2023 թվականի դրությամբ Հայաստանում գործում է մոտ 53 հազար միկրոձեռնարկատեր։ Նրանց մի մասն ակտիվ է մանրածախ և մեծածախ առևտրի ոլորտում, մյուսները գործում են սպասարկման և մշակող արդյունաբերության բնագավառներում։