Ջալալ Հարությունյանի դատավճռի դեմ բողոքներ են ներկայացվել

PanARMENIAN.Net - Պաշտպանության բանակի նախկին հրամանատար Ջալալ Հարությունյանի վերաբերյալ ընդհանուր իրավասության դատարանի կայացրած դատավճիռը բողոքարկվել է։ Պաշտպանության կողմը պահանջում է նրա արդարացումը, մինչդեռ տուժող կողմը՝ պատժի խստացում, հայտնում է «Փաստինֆոն»։

Դատարանը մեղավոր է ճանաչել Ջալալ Հարությունյանին՝ ՀՀ քրեական օրենսգրքի 550-րդ հոդվածի 3-րդ մասով, դատապարտելով նրան հինգ տարի վեց ամիս ազատազրկման։ Դատաքննության ընթացքում պաշտպանությունը միջնորդել է արդարացնել Ջալալ Հարությունյանին, մինչդեռ դատախազը պահանջել է վեց տարվա ազատազրկում, իսկ տուժող կողմը՝ առավելագույն պատիժ՝ ութ տարի։

Գործով վերաքննիչ բողոք են ներկայացրել ինչպես պաշտպանական կողմը, այնպես էլ տուժող կողմը։ Տուժողների իրավահաջորդների ներկայացուցիչ Լիպարիտ Սիմոնյանը պահանջել է խստացնել Ջալալ Հարությունյանի նկատմամբ նշանակված պատիժը՝ սահմանելով ութ տարվա ազատազրկում։

Պաշտպանության կողմը ներկայացրել է երեք առանձին բողոք։ Փաստաբան Անդրանիկ Մնացականյանը պահանջել է ամբողջությամբ վերացնել առաջին ատյանի դատարանի դատավճիռը և ընդունել նոր որոշում, որով Ջալալ Հարությունյանը կճանաչվի անմեղ։ Փաստաբան Արսեն Սարդարյանը ևս պահանջել է վերացնել գործող դատավճիռը՝ արդարացման կամ գործի նոր քննության ուղարկման պահանջով։ Իսկ փաստաբան Էդգար Այվազյանը, արդարացման կամ նոր քննության անհնարինության պարագայում, պահանջել է կիրառել առավել մեղմ պատիժ։

Վերաքննիչ բողոքները կքննվեն Վերաքննիչ քրեական դատարանում՝ դատավոր Մխիթար Պապոյանի նախագահությամբ, իսկ կազմը կներառի դատավորներ Լուսինե Աբգարյանին և Ռոբերտ Պապոյանին։

Գործով նախաքննության փուլում երկու դրվագ է քննության առարկա դարձել։ Առաջինը՝ 2020 թվականի հոկտեմբերի 7-ի հակահարվածի վերաբերյալ դրվագով հետապնդումը դադարեցվել է։ Երկրորդ դրվագով՝ հոկտեմբերի 12-ին «Ցորի» զորամասի Դ20 դիվիզիոնի վրա հակառակորդի հարձակման վերաբերյալ, մեղադրանքը փոխանցվել է դատարան։

Ըստ մեղադրական եզրակացության՝ Ջալալ Հարությունյանը՝ ՊԲ հրամանատար, գեներալ-լեյտենանտ, հանդիսանալով պաշտոնատար անձ՝ ռազմական դրության պայմաններում անբարեխիղճ և անփույթ վերաբերմունք է ցուցաբերել իր ծառայողական պարտականությունների նկատմամբ, որի հետևանքով առաջացել են ծանր հետևանքներ։ Մասնավորապես, երբ դիվիզիոնի հրամանատարությունը հայտնել է հակառակորդի հարձակման մասին, ըստ գործի նյութերի, Ջալալ Հարությունյանը պատասխանել է, թե մոտեցողները «յուրայիններ» են։

Նրա նկատմամբ որպես խափանման միջոց կիրառվել է չբացակայելու արգելքը։