Ընդդիմադիր, Հայաստանի Հանրապետական կուսակցության պատգամավոր Տիգրան Աբրահամյանն ապրիլի 3-ին կայացած մամուլի ասուլիսում հայտարարել է, որ ներկայումս մոտ 200 հայ զինծառայողի գտնվելու վայրը շարունակում է անհայտ մնալ։ Նա հիշեցրել է, որ Ադրբեջանը պաշտոնապես հաստատել է միայն 23 գերեվարված անձի առկայությունը, հայտնում է News.am-ը։

Պատգամավորը հորդորել է հասարակությանը չկենտրոնանալ միայն նշված թվի վրա՝ հավելելով, որ 44-օրյա պատերազմից հետո համացանցում տարածված մի շարք տեսանյութերում մի քանի ծնողներ կարողացել են ճանաչել իրենց որդիներին։

«Այս տեսանկյունից, երբ խոսում ենք ընդամենը 23 գերու մասին, մենք ֆիզիկական վտանգի ենք ենթարկում անհետ կորածներին, քանի որ անհայտ է, թե ինչ ճակատագիր են նրանք ունեցել, և անհնար է հիմնվել Ադրբեջանի թվերի վրա»,- նշել է նա։

Աբրահամյանը կարևորել է ոչ միայն հաստատված գերիների վերադարձի, այլև անհետ կորածների ճակատագրի պարզման ուղղությամբ աշխատանք տանելու անհրաժեշտությունը։

«Հայաստանի իշխանությունները կարող էին այս հարցերի շուրջ բանակցել գոնե խաղաղ համաձայնագրի քննարկումների շրջանակից դուրս, բայց փոխարենը ցուցաբերում են անտարբերություն»,–ասել է նա։

2025 թվականի փետրվարի 7-ին ՀՀ և Ադրբեջանի սահմանին կայացել է Հայաստանի գերիների, պատանդների և անհետ կորած անձանց հարցերով զբաղվող միջգերատեսչական հանձնաժողովի ու Ադրբեջանի ռազմագերիների, պատանդների և անհետ կորած քաղաքացիների հարցերով պետական հանձնաժողովի հանդիպումը: Հանդիպման ընթացքում կողմերը կարծիքներ են փոխանակել անհետ կորած անձանց ճակատագրի պարզաբանման հարցերի վերաբերյալ և համաձայնության եկել, որ հանձնաժողովների միջև փոխադարձ համաձայնությամբ քննարկումները կշարունակվեն:

Պաշտոնական տվյալներով՝ 90-ականների սկզբից անհետ կորած է համարվում 993 հայ, 44-օրյա պատերազմից հետո անհետ կորել է մոտ 200 հայ զինվոր։ Հայաստանը 44–օրյայից հետո Ադրբեջանին է փոխանցել 51 ադրբեջանցիների մարմին, ինչպես նաև 1990-ականներին զոհված 140 ադրբեջանցիների ոսկրեր։