Աբրահամյան․ Տապալված «բնակարանային ծրագրի» հետևանքների համար նաև որպես պետություն ենք թանկ վճարելու

PanARMENIAN.Net - ԱԺ պատգամավոր Տիգրան Աբրահամյանը ֆեյսբուքյան իր էջում նշել է, որարցախցիների սոցիալական և իրավական խնդիրները բազմաշերտ են,սակայն իշխանությունները ոչ միայն չեն լուծել դրանք, այլ նաև խեղաթյուրած տեղեկատվությամբ մոլորեցնում են հանրությանը և արցախցիների դեմ քարոզչություն իրականացնում։

Նա նշել է, որ տապալված «բնակարանային ծրագրի» հետևանքների համար նաև որպես պետություն ենք թանկ վճարելու։

«Արցախցիների սոցիալական վիճակի, իրավունքների պաշտպանության և վերականգնման խնդիրը բավականկն բազմաշերտ է, իսկ ստեղծված իրավիճակում, միակ բանը, որն անում է իշխանությունը` հանրությանը ստահոդ տեղեկություններով խճճելն ու արցախցիների դեմ կեղտոտ քարոզչություն գեներացնելն է:

Ես համոզված եմ, որ եթե նման խնդիր ունենար ՀՀ ցանկացած մարզ, ապա այս իշխանությունը նույն շաբլոն, կեղծ տեղեկություններով ատելություն կսերմաներ այդտեղի ծագում ունեցողների նկատմամբ, իսկ նրանց` իրավունքների պաշտպանության հարցը, կդիտարկեր «պետության ու խաղաղության դեմ ուղղված սպառնալիք»:

Սոցիալական ծրագրերի կրճատումն ու տապալված «բնակարանային ծրագիրը» չափազանց բարդ իրավիճակի է հանգեցնելու, որի ծանր հետևանքների համար նաև որպես պետություն ենք թանկ գին վճարելու»,-գրել է նա:

Արցախցիների իրավունքների պաշտպանության խորհրդի ներկայացուցիչներին ապրիլի 3–ին կառավարությունում փոխվարչապետ Տիգրան Խաչատրյանի հետ հանդիպմանն ասել են, որ վերադարձ «40+10» աջակցության ծրագրին չի նախատեսվում։

Ապրիլի 1-ից ուժի մեջ մտած փոփոխություններով՝ էապես նվազեցվել է տեղահանված արցախցիների համար նախատեսված բնակվարձի աջակցության ծավալը։ «40+10» անվանումով ծրագիրը յուրաքանչյուր տեղահանվածի համար ներառում էր ամսական 40,000 դրամ՝ բնակվարձի, և 10,000 դրամ՝ կոմունալ վճարների համար։ Մարտի 29-ին Ազատության հրապարակում կայացած հանրահավաքի ընթացքում, Արցախի շահերի պաշտպանության խորհուրդը հրապարակել է իշխանություններին և միջազգային կառույցներին հասցեագրված 12 կետից բաղկացած պահանջագիր, որի առանցքային պահանջներից էր՝ չկրճատել աջակցության ծավալը և մշակել նոր բնակապահովման ծրագիր։ Նրանք կառավարությանը մեկ շաբաթ ժամանակ են տրամադրել՝ պատասխան ստանալու համար՝ շարունակելով նաև բողոքի տարբեր գործողություններ։