Զոհրաբյան. Շուտով մասսայաբար կտեսնենք երեխաների հետ փողոցներում հայտնված արցախցիների

PanARMENIAN.Net - Քաղաքական գործ Նաիրա Զոհրաբյանը, անդրադառնալով կառավարության այն որոշմանը, ըստ որի այլևս չի շարունակվելու Արցախից տեղահանվածների համար սահմանված 50 հազար դրամի օգնության ծրագիրը, ֆեյսբուքյան իր էջում գրել է, որ ծրագիրը եղել է արցախցիների միակ տարբերակը՝ տան վարձը վճարելու ու անօթևան չմնալու համար։

Նրա խոսքով՝ մինչ այժմ միայն 3 տոկոսն է ստացել բնակարանային աջակցության սերտիֆիկատները, իսկ բնակարան ձեռք բերածների թիվը կազմում է ընդամենը 0.2 տոկոս։

«Ի՞նչ է սա նշանակում։ Սա նշանակում է, որ շուտով մենք մասսայաբար տեսնելու ենք երեխաների հետ փողոցներում հայտնված արցախցիներ և իրավունք էլ չենք ունենալու մուննաթ գալ սեփականատերերի վրա, թե ինչի՞ անվճար չեն պահում արցախցիներին, քանզի դա բացառապես պետության ֆունկցիան է, բայց պետությունը, իսկ ավելի ճիշտ՝ Նիկոլը, ամեն ինչ անում է՝ իր մեղքով գաղթական դարձած արցախցիներին մինչև վերջ նվաստացնելու համար։ Երևի մուռ է հանում, որ նրանք չմնացին ցեղասպանվող Արցախում ու մինչև վերջին մանուկը չկոտորվեցին, և իրեն չմատուցեցին՝ «չկա մարդ, չկա պրոբլեմ» իդիլիկ իրավիճակը”,–գրել է նա։

Նա հավելել է, որ այն, ինչ հիմա արվում է արցախցիների հանդեպ՝ դա անմարդկային է։

«Իրավիճակը փակուղային է․․․Մարդիկ հայտնվելու են փողոցում, ուղղակի փողոցում։ Կանադայի արտաքին գործերի նախարարը հայտարարում է, թե Արցախի էջը փակված չէ և արցախյան բանակցությունները պիտի շարունակվեն՝ հիմքում ունենալով նաև արցախցիների ինքնորոշման իրավունքը, երեկ Եվրոպական խորհրդարանն իր լիագումար նիստում դատապարտում է Արցախի էթնիկ զտումը՝ զուգահեռներ անցկացնելով Հայոց ցեղասպանության հետ, իսկ Նիկոլը հայտարարում է՝ «թռնեք վերև, իջնեք ներքև, ղարաբաղյան շարժման էջը փակված է»,–գրել է Զոհրաբյանը։

Արցախցիների իրավունքների պաշտպանության խորհրդի ներկայացուցիչներին ապրիլի 3–ին կառավարությունում փոխվարչապետ Տիգրան Խաչատրյանի հետ հանդիպմանն ասել են, որ վերադարձ «40+10» աջակցության ծրագրին չի նախատեսվում։ Քննարկումից հետո խորհրդի ներկայացուցիչները ընդգծել են, որ պայքարը շարունակելու են, քանի որ «40+10-ն այլընտրանք չունի»։