Արցախցիների իրավունքների պաշտպանության խորհրդի անդամները Շահրամանյանի հետ քննարկել են գործակցության հնարավորությունը

PanARMENIAN.Net - Արցախցիների իրավունքների պաշտպանության խորհրդի որոշ ներկայացուցիչներ ապրիլի 17-ին հանդիպում են ունեցել Արցախի Հանրապետության նախագահ Սամվել Շահրամանյանի հետ:

Կողմերը քննարկել են Խորհրդի կատարած աշխատանքները և հրապարակված օրակարգի շուրջ համագործակցության հնարավորությունները: Խորհրդի անդամները հետաքրքրվել են ԱՀ իշխանությունների դիրքորոշումների և ծրագրերի վերաբերյալ՝ կարևորելով ջանքերի ներդաշնակեցման անհրաժեշտությունը:

Արցախցիների իրավունքների պաշտպանության խորհուրդը բողոքի ակցիաներ է իրականացրել ՀՀ արտաքին գործերի նախարարության և գլխավոր դատախազության շենքերի դիմաց։Այս միջոցառումների նպատակն է ներկայացնել մի շարք հիմնարար հարցեր, որոնց լուծումը, խորհրդի համոզմամբ, չի կարող այլևս հետաձգվել։

Արցախցիների համար նախատեսված «40+10 հազար դրամի» ծրագրի չեղարկումը, որն ուժի մեջ է մտել ապրիլի 1–ից, մեծ դժգոհություն է առաջացրել ԼՂ–ից բռնի տեղահանվածների շրջանում։ Շատերը կարծում են, որ դա կնպաստի արցախցիների արտագաղթին։