Երևանի քաղաքապետ Տիգրան Ավինյանը քաղաքապետարանի գործակարգավարական խորհրդակցության, անդրադառնալով վերջին ձերբակալություններին Շենգավիթ վարչական շրջանի աշխատակազմում, ընդգծել է, որ կոռուպցիոն երևույթների դեմ պայքարի համար միայն մեկ-երկու գործողություն չի բավականացնում․ համակարգային լուծումների կարիք կա։
«Պարոն Մկրտչյան, ունենք ձերբակալություններ, լավ առիթ է արձանագրել, որ կոռուպցիոն դրսևորումները մեզ համար անընդունելի են: Եվ այս մակարդակում ինչքան պետք է այս գործողությունները տեղի ունենան, որպեսզի, ընդհանուր առմամբ, մենք այս խաղի կանոնները հասկանանք»,- ասել է նա՝ դիմելով Շենգավիթ վարչական շրջանի ղեկավար Ռազմիկ Մկրտչյանին, հայտնում է «Առավոտը»։
«Պետք է ցավով նշեմ, որ տարածվեցին լուսանկարներ, որոնք կարող էին ապակողմնորոշել հանրությանը, տպավորությունն այնպիսին էր, որ կարծես ինձ են ձերբակալել: Իմ և ԱԱԾ ծառայողի լուսանկարները կամ նյութերը այնպիսի դասավորություն ունեին, որ պիտի ապակողմնորոշեին մեր հանրությանը, իսկ դեպքի մասով նշեմ, որ դեպքը տեղի չի ունեցել վարչական շենքում և իմ ներկայությամբ… Եթե չեմ սխալվում, այս պահին մեր աշխատակիցներից մեկ հոգի տնային կալանքի մեջ է, նախաքննությունը շարունակվում է, որևէ այլ բան չեմ կարող ասել, կարող եմ փաստել և վերահաստատել մեր դիրքորոշումը, որ համայնքային, պետական բյուջեից մեկ լումա անգամ գողանալը, մեղմ ասած սրիկայություն է»,-ասել է Շենգավիթ վարչական շրջանի ղեկավար Ռազմիկ Մկրտչյանը:
Ավինյանը հայտարարել է, որ երբեմն գայթակղությունն այն աստիճան ուժեղ է լինում, որ անհապաղ պետք է մտածել ամբողջ համակարգը բարեփոխելու մասին, որպեսզի բացառվեն նման երևույթները։
իսկ Ռազմիկ Մկրտչյանն արձագանքել է հետևյալ կերպ. «Համակարգն այնպիսին է, որ արկածախնդրություն է նման քայլի գնալը, հատկապես որ Շենգավիթ վարչական շրջանում ամիսը մեկ անգամ ֆիլտրացիա ենք անում»:
Ապրիլի լույս 20–ի գիշերը Շենգավիթ վարչական շրջանի աշխատակազմում իրավապահները գործողություններ են իրականացրել։ Աշխատակիցներ են ձերբակալվել։ Այդ տեղեկությունը հաստատել են Հակակոռուպցիոն կոմիտեից:
