Հրանուշ Հակոբյանը հանդիպել է «Արի տուն 2009» ծրագրի մասնակիցների հետ

4 օգոստոսի 2009 - 17:47 AMT

PanARMENIAN.Net - ՀՀ սփյուռքի նախարարույթան «Արի Տուն» ծրագրի առաջին փուլի արդյունքները վկայում են, որ այն կդառնա ամենամյա: Այս մասին օգոստոսի 3-ին «Արի Տուն 2009» ծրագրի երկրորդ փուլի մասնակից շուրջ 60 սփյուռքահայ երիտասարդների հետ կայացած հանդիպման ժամանակ հայտնեց ՀՀ սփյուռքի նախարար Հրանուշ Հակոբյանը:

Հանդիպմանը ներկա էին հյուրընկալող ընտանիքների անդամները, ծրագրի իրականացման համար պատասխատու ՀՀ կրթության եւ գիտության, առողջապահության, տարածքային կառավարման, պաշտպանության նախարարությունների բարձրաստիճան պաշտոնյաներ, Երեւանի վարչական շրջանների ներկայացուցիչներ:

Նախարար Հ.Հակոբյանը հույս հայտնեց, որ ծրագրի ընթացքում երիտասարդների համար ստեղծված լավ պայմանները` հայրենագիտական դասաժամերը, այցելությունները թանգարաններ, տեսարժան վայրեր, հայկական բանակի զորամաս, այս ամենից ստացված տպավորությունները այնպես կկապեն Հայաստանին, որ «իրենց սիրտը Հայրենիքում թողած կվերադառնան Հայրենիք»: Նախարարը համոզված է, որ Գերմանիայից, Ֆրանսիայից, Չեխիայից, Իսրայելից, Ռուսաստանից, Ուկրաինայից եւ Վրաստանից ընդամենը երկու շաբաթով Հայաստան այցելած այս պատանիներն ու աղջիկներն այլեւս չեն մոռանա իրենց Հայրենիքը:

Նախախարը հորդորեց նաեւ, որ հայ երիտասարդները հնարավորինս շատ գիտելիք ձեռք բերեն, վարեն առողջ ապրելակերպ, ընտանիք կազմեն հայի հետ եւ շատ երեխաներ ունենան:

Ծրագիրը մեկնարկել է 2009թ. մայիսին: 6 ամսվա ընթացքում զանազան երկրներից հայ երիտասարդության 14-25 տարեկան ներկայացուցիչները հյուրընկալվելու են Հայաստանում:

Ծրագրի առաջին փուլին, որը մեկնարկել է հուլիսի 15-ին, մասնակցել են հայ սփյուռքի 137 ներկայացուցիչներ Սիրիայից, Թուրքիայից, Վրաստանից, Ուկրաինայից, Եգիպտոսից, Իրանից եւ Ռուսաստանից:

Մասնակիցների ընդունելությունն ու ճանապարհելը կազմակերպված է ՀՀ Սփյուռքի նախարարության ֆինանսական աջակցությամբ: Ծրագրի շրջանակներում իրականացվում են մի քանի միջոցառումներ, որոնց ընթացքում մասնակիցները հնարավորություն կստանան ակտիվորեն հաղորդակցվել իրենց տարեկիցների հետ Հայաստանում, կապեր հաստատել, ծանոթանալ ՀՀ հուշարձանների եւ պատմության հետ, այցելել ցուցահանդեսներ եւ փառատոներ, թատերական ներկայացումներ: