Փարիզում հայերը լայնամասշտաբ հանրահավաք են անցկացրել Հայոց ցեղասպանության 95-րդ տարելիցին նվիրված

24 ապրիլի 2010 - 23:18 AMT

PanARMENIAN.Net - Փարիզում, Կոմիտասի հուշարձանի մոտ տեղի ունեցավ հանրահավաք, որը նվիրված էր Հայոց ցեղասպանության 95-րդ տարելիցին: PanARMENIAN.Net ի թղթակցին հանրահավաքի մասնակից Պետրոս Արմանդյանը հայտնել է, որ հանրահավաքին մասնակցել է 6000-7000 մարդ, հիմնականում Ֆրանսիայի հայկական համայնքի ներկայացուցիչները:

Հանրահավաքին մասնակցել է նաև համաշխարհային ճանաչում ունեցող երգիչ Շառլ Ազնավուրը և նրա իմպրեսարիո Լևոն Սայանը: Կոմիտասի արձանի մոտ ելույթ ունենալուց հետո ակտիվիստները ճանապարհվել են դեպի Թուրքիայի հյուպատոսություն:

Այդտեղ ելույթ են ունեցել ՀՅԴ արևմտաեվրոպական բյուրոյի ղեկավար Մուրադ Փափազյանը, Կոմունիստական կուսակցության, Ֆրանսիայի նախագահի “Ազգային շարժման միություն” կուսակցության ներկայացուցիչներ, ինչպես նաև The California Courier թերթի հրատարակիչ Հարութ Սասունյանը:

Ակտիվիստները վանկարկել են “Թուրքիա, դու ցեղասպանություն ես իրականացրել”, “ Հայ ժողովուրդը արդարություն է պահանջում”, “Արձանագրություններին` ո’չ”:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: