Սանահինի վանքի տարածքում տեղադրվեցին բացօթյա բազմալեզու տեղեկատվական վահանակներ

PanARMENIAN.Net - ՎիվաՍել-ՄՏՍ-ը` «ՄՏՍ» ԲԲԸ-ի դուստր ձեռնարկությունը, և ԱՄԱՓ մշակութային հասարական կազմակերպությունը, հայտարարում են, որ «Ճանաչեք hայկական հուշարձանները» 2010թ. ծրագրում ընդգրկված հերթական պատմամշակույթային ժառանգության վայրում` հարուստ պատմությամբ և հիասքանչ բնությամբ օժտված Լոռու մարզի Սանահինի վանքում, պատրաստվել և տեղադրվել են բացօթյա բազմալեզու տեղեկատվական վահանակներ:

«Տևական ժամանակ կյանքի կոչվող այս ծրագրի հիմքում մեր արմատներին մոտ լինելու և հայի անցած ուղին ճանաչելու ձգտումն է: Տեղեկատվական բազմալեզու վահանակները, տարիներ անց, յուրօրինակ պատմական ուղերձի դեր կարող են ստանձնել ապագա սերունդների համար` ներկայացնելով մեր ոգու կանչն ու մտածողությունը: Համոզված ենք, որ այս վահանակները այցելուներին հնարավորություն կտան զգալ Բագրատունիների շունչը կամ առավել լիարժեք պատկերացում կազմել Գրիգոր Մագիստրոսի իմաստնության մասին.,-վստահություն հայտնեց ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

Սանահինի վանքը Լոռու մարզում գտնվող Հաղպատ վանքի հետ միասին գրանցված է Համաշխարհային ժառանգության ցանկում և ճանաչված է որպես բացառիկ համընդգրկուն արժեք, որը ենթակա է պահպանության որպես համայն մարդկության ժառանգություն: Սանահինի հիմնադրման ճշգրիտ տարեթիվը հայտնի չէ: Ըստ ավանդության, վանքը հիմնարկվել է 4-րդ դարում` երբ կանգնեցվել է Սբ. Նշանը` խաչը: «Սանահին» անվանումը բացատրվում է ՙսա նրանից հին է՚ արտահայտությաբ. ըստ ավանդության` Սանահին է կոչվել Հաղպատից ավելի հին վանքը:

Սանահինի վանական համալիրը բաղկացած է հինգ եկեղեցիներից, երկու գավիթներից, ակադեմիայից, գրատնից, զանգակատնից, տոհմական դամբարաններից և երբեմնի ամուր պարսպապատով շրջափակված այլ շինություններից: Սանահինի բարձրարժեք խաչքարերից հատկապես ուշագրավ են Սբ Աստվածածին եկեղեցու արևելյան կողմում գտնվող Գրիգոր Տուտեորդու խաչքար-մահարձանը (1184թ.) և Սարգսի (1215թ.) խաչքարը, որոնք խաչքարային արվեստի իսկական գլուխգործոցներ են: Ճեմարանը կամ «Մագիստրոսի ակադեմիան» կազմում է Սբ Աստվածածին եկեղեցու գավթի շարունակությունը. այն 10-րդ դարի վերջին և 11-րդ դարի սկզբին բնորոշ քաղաքացիական ճարտարապետության օրինակ է:

ԱՄԱՓ-ի ծրագրերն իրականացվում են հովանավորների` «ՎիվաՍել-ՄՏՍ»-ի (Հայաստանում և այս տարածքում բջջային կապի առաջատար oպերատորի), Հայաստանում ԱՄՆ դեսպանների մշակութային հիմնադրամի, USAID/CAPS-ի, Գյումրիում Իտալիայի պատվո հյուպատոսի, ինչպես նաև Նորվեգիայի արտաքին գործերի նախարարության ֆինանսական աջակցության շնորհիվ: ԱՄԱՓ-ի գործընկերներն են Հայաստանի հուշարձանների և տեսարժան վայրերի միջազգային խորհրդի Հայաստանի ազգային կոմիտեն (ԻԿՕՄՕՍ/Հայաստան ՀԿ), Մայր Աթոռ Սուրμ Էջմիածինը, ՀՀ ԳԱԱ Բուսաբանության ու Հնագիտության և ազգագրության ինստիտուտները, Մատենադարանն ու ՀՀ Կապի և տրանսպորտի, ինչպես նաև Մշակույթի նախարարությունը, և Հայաստանի զբոսաշրջային գործակալությունը, ասվում է ՎիվաՍել-ՄՏՍ ընկերության մամլո հաղորդագրության մեջ: