Հունվարի 13-ին հայերը նշում են Քրիստոսի Անվանակոչության տոնը

PanARMENIAN.Net - Ամեն տարի հունվարի 13-ին Հայ Առաքելական եկեղեցին նշում է Հիսուս Քրիստոսի Անվանակոչության տոնը: Այդ օրը բոլոր եկեղեցիներում առավոտյան Սուրբ Պատարագ կմատուցվի, PanARMENIAN.Net ին հաղորդել են Արարատյան Հայրապետական թեմի մամլո դիվանից:

Ըստ հրեական օրենքի` ծննդյան 8-րդ օրը Հիսուս, ինչպես նորածին ամեն մի արու զավակ, թլպատվեց և անվանակոչվեց: Այդ մասին վկայում է Ղուկաս Ավետարանիչը. «Եվ երբ ութ օրերը լրացան, և նա թլպատվեց, նրա անունը Հիսուս դրվեց, ինչպես հրեշտակի կողմից կոչվել էր, երբ դեռ չէր հղացվել մոր որովայնում» (Ղուկ. 2:21): Հիսուս եբրայերեն բառ է, որ նշանակում է Փրկիչ: Հիսուս անվանը զուգահեռ Փրկչին տրվում է նաև Քրիստոս անունը: Այն հունարեն բառ է, որ նշանակում է Օծյալ և համապատասխանում է եբրայերենի Մեսիային:

Քրիստոսի Անվանակոչության տոնը (լատ. Praesentatio Domini) քրիստոնեական տոն է, որը նշվում է նաև կաթոլիկների, ուղղափառների և լյութերականների կողմից: Քրիստոսի Անվանակոչությունը խորհրդանշում է Հին և Նոր Կտակարանների հանդիպումը: