Ապրիլի 18-ին`«Դեպի միջմարզային համագործակցության նոր ձեռքբերումներ` հայ-ռուսական դաշնակցային հարաբերություններում» հայ-ռուսական համաժողովի շրջանակներում Արամ Խաչատրյան համերգասրահում տեղի ունեցավ Օլեգ Լունդստրեմի ջազային պետական կամերային նվագախմբի (գեղարվեստական ղեկավար և գլխավոր դիրիժոր Բորիս Ֆրումկին) և Հայաստանի ջազային նվագախմբի համատեղ համերգը (գեղարվեստական ղեկավար և գլխավոր դիրիժոր Արմեն Հյուսնունց): Համերգը իրենից ներկայացնում էր երկու նվագախմբերի յուրօրինակ «մենամարտ», որոնք առանձին-առանձին նվագում էին համաշխարհային և հայկական ջազ ստեղծագործություններ, իսկ միասին կատարեցին Կոնստանտին Օրբելյանի «Դիլիջան» ստեղծագործությունը:
«Այսօրվա համերգով բոլորիս մոտ տոնական բարձր տրամադրություն ապահովվեց, նման տոները մեզ հիմա շատ են պակասում, մի քիչ դժվար էր, քանի-որ միայն 5-6 օր առաջ ստացանք ծրագիրը, և կարճ ժամանակահատվածում ենք արել ամեն ինչ»,- ասաց Արմեն Հյուսնունցը:
«Հիանալի նվագախումբ է Արմեն Հյուսնունցի նվագախումբը, ուրախ եմ, որ համագործակցեցինք իրար հետ: Ես մեծ խանդավառություն ապրեցի այսօր: Կցանկանայի առանձին համերգով հանդես գալ Երևանում, և ինչ-որ ավելի լավ և ավելի պատրաստված ծրագրով, իսկ էքսպերիմենտների տեսքով այս համերգը հետաքրքիր էր»,-ասաց Բորիս Ֆրումկինը:
Օլեգ Լունդստրեմի նվագախումբն իր գոյության 77 տարիների ընթացքում առաջին անգամ էր Հայաստանում, համերգային ծրագիրը կրճատվեց, քանի-որ ըստ Ֆրումկինի, այն մի քիչ երկար էր և ինչքան էլ որ հետաքրքիր լիներ, առանց ընդմիջման համերգը հանդիսատեսին կհոգնեցներ: Համերգին ներկա էին Հայաստանի վարչապետ Տիգրան Սարգսյանը, ՀՀ մշակույթի նախարար Հասմիկ Պողոսյանը իր տեղակալներով, և այլ պաշտոնատար անձինք ու ոլորտի մասնագետներ:
