Հայաստանում բավականաչափ չեն սատարում կրծքագեղձի քաղցկեղի ախտորոշմամբ կանանց

PanARMENIAN.Net - «ՄաՄաՍյու» բարեգործական հիմնադրամն օգնության կոչ է անում տարբեր կազմակերպություններին, որոնք պատրաստ են ձեռք մեկնել կրծքագեղձի քաղցկեղով տառապող հայ կանանց: Ներկայումս հիմնադրամը դրամահավաք է իրականացնում Սյու Սեպետչյանի մայրիկի համար, որն ունի կրծքագեղձի քաղցկեղ: Շտապ վիրահատությունից հետո նրան նշանակվել է «Հերցեպտին» թանկարժեք դեղորայքը (մեկ սրվակի արժեքը 3000 ԱՄՆ դոլար, ընդհանուր բուժման կուրսը` 18 սրվակ, ինչը կազմում է 54.000 ԱՄՆ դոլար): Ընդ որում` «Հերցեպտին»-ը չի մտնում պետպատվերով նախատեսված դեղորայքի ցանկի մեջ: Ինչպես հաղորդում է Հիմնադրամի մամլո ծառայությունը, նախաձեռնության շուրջ այսօր արդեն համախմբվել են Հայաստանի հարյուրավոր քաղաքացիներ: «Հիմնականում նրանք կանայք են, որոնք հասկանում են, որ այս խնդիրը մասնավոր չէ և նման վիճակում կարող է հայտնվել յուրաքանչյուր կին: Հայաստանի վիճակագրական տվյալները ցույց են տալիս, որ ամեն 13-րդ կինը բախվում է նմանատիպ խնդրի հետ, ընդ որում` նրանց 30%-ը «Հերցեպտին» դեղամիջոցի կարիքն ունի»,- ասվում է Հիմնադրամի հայտարարության մեջ:

Սեպետչյանի մայրիկի փորձը շատերի համար տեսանելի դարձրեց կրծքագեղձի քաղցկեղի ախտորոշմամբ կանանց նկատմամբ ոչ բավարար պետական աջակցության փաստը: Մյուս կողմից միջազգային և տեղական բարեգործական կազմակերպություններն առ այսօր մերժում են Հիմնադրամի դիմումը` հիմք ընդունելով, որ Հայաստանում անվճար բուժում են քաղցկեղը, ինչը սակայն ճիշտ է միայն մասամբ:

Ապրիլի 14-ի դրությամբ հիմնադրամին հաջողվել է հավաքել ընդամենը 3000 ԱՄՆ դոլար` «Հերցեպտին»-ի մեկ սրվակի արժեքը: Ցանկացողները կարող են ֆինանսական միջոցներ փոխանցել Զարգացման հայկական բանկի դրամային հաշվեհամարին` 18100 - 52017003313 Կանանց Ռեսուրսային Կենտրոն (պարտադիր նշել):