Բրիտանացի եպիսկոպոսը ստիպված կլինի 6,5 հազար եվրո վճարել Գերմանիային Հոլոքոսթի ժխտման համար

13 հուլիսի 2011 - 13:00 AMT

PanARMENIAN.Net - Բավարիայի Ռեգենսբուրգ քաղաքի դատարանը չի բավարարել բրիտանացի կաթոլիկ եպիսկոպոս Ռիչարդ Ուիլյամսոնի բողոքարկումը և դատապարտել է 6,5 հազար եվրո տուգանքի վճարման Հոլոքոսթը ժխտելու համար:

Ուիլյամսոնը սկանդալային արտահայտություններ է արել 2008թ. շվեդական հեռուստաալիքով, գտնվելով Ռեգենսբուրգում, հայտնում է Deutsche Welle-ն:

Մասնավորապես, Ուիլյամսոնը շվեդական հեռուստաալիքին տված հարցազրույցում վիճարկել է գազի խցիկների առկայությունը համակենտրոնացման ճամբարներում: Պաշտպանությունը պահանջել է արդարացնել հոգևորականին, քանի որ նա համաձայնություն չի տվել, որ իր հարցազրույցը հրապարակվի Գերմանիայում:

2010թ. ավարտված առաջին դատավարության ժամանակ հոգևորականը տուգանվեց 10 հազար եվրոյով: Դրանից հետո նրա փաստաբանները բողոքարկեցին որոշումը՝ պահանջելով արդարացնել 71-ամյա Ուիլյամսին, իսկ մեղադրող կողմը ձգտում էր տուգանքի չափը հասցնել 12 հազար եվրոյի:

Հոլոքոսթ

Հոլոքոսթը Երկրորդ համաշխարհային պատերազմի տարիներին գերմանական նացիստների կողմից միլիոնավոր մարդկանց համակարգված հետապնդումն ու գնդակահարումն էր, որի զոհը դարձան հրեական ժողովրդի գրեթե մեկ երրորդը եւ այլ փոքրամասնությունների բազմաթիվ ներկայացուցիչներ, որոնք խտրականության, վայրագությունների ու դաժան սպանությունների ենթարկվեցին: 1949թ. Համաշխարհային հրեական կոնգրեսի կողմից Եվրոպայի երկրներում պատերազմից առաջ եւ հետո հրեաների թվի կատարած համեմատությունը հանգեցրեց այն եզրակացության, որ Աղետի ժամանակ զոհվել է վեց միլիոն մարդ: Այդ թիվն ամրագրված է գլխավոր ռազմական հանցագործների Նյուրնբերգյան գործընթացի, Էյխմանի գործընթացի վճիռներում եւ ճանաչվել է Աղետի վիճակագրության հարցերով գիտնականների միջազգային խորհրդակցության (Փարիզ, 1987թ.) մասնակիցների մեծ մասի կողմից, երբ քննարկվում էին 4,2-6 միլիոն թվերը: