10 սեպտեմբերի 2011 - 13:21 AMT
Լատինական Ամերիկայի երկրները կարող են ճանաչել Արցախի անկախությունը, գտնում է Ստեփան Սաֆարյանը

Լատինական Ամերիկայի երկրները կարող են ճանաչել Արցախի անկախությունը և հայկական դիվանագիտությունը պետք է աշխատի այդ ուղղությամբ: Այդ մասին Երևանում կայացած մամլո ասուլիսում հայտարարել է «Ժառանգություն» խորհրդարանական խմբակցության ղեկավար Ստեփան Սաֆարյանը՝ մեկնաբանելով Ուրուգվայի ԱԳՆ ղեկավար Լուիս Ալմագրոյի երեկվա հայտարարությունն այն մասին, որ ԼՂՀ-ն Հայաստանի պատմական մասն է և պետք է միանա նրան սեղմ ժամկետում: « Այդ երկրները կարող են գնալ նման քայլի, քանի որ լուրջ աշխարհաքաղաքական շահեր չունեն տարածաշրջանում, որոնք հետ կպահեին նրանց դրանից, բացի այդ նրանց քաղաքականության մեջ առկա է բարձր արժեքային համակարգը»,-նշել է Սաֆարյանը: Նա հավելել է, որ Լատինական Ամերիկայի մի շարք երկրներ պատրաստ էին քննարկել այդ հարցը և ճանաչել Արցախի անկախությունը դեռևս 20-րդ դարի 90-ականներին, երբ ՀՀ արտգործնախարարը դեռևս Րաֆֆի Հովհաննիսյանն էր:

Ըստ Սաֆարյանի, «Լեռնային Ղարաբաղի հետ կապված բարդագույն խնդիրը, որ պետք է լուծի հայկական դիվանագիտութունը, այն է, որ պետք է հասնել ապագաղութացման օրինականացմանն ու միջազգային ճանաչմանը»: Նա քննադատել է իշխանություններին՝ «Ժառանգության» առաջարկը մերժելու ու առաջինը ԼՂՀ-ն ճանաչելու մասին, և կասկա] է հայտնել, թե ՀՀ իշխանություննրն ակտիվ քաղաքականություն կվարեն ԼՂՀ միջազգային ճանաչմանը հասնելու համար:

Սեպտեմբերի 9-ին Ամերիկայի Հայ Դատի hանձնախմբի (ԱՀԴՀ) և Ուրուգվայ-Հայաստան խորհրդարանական խմբի կողմից նախաձեռնված Հայաստան-Ուրուգվայ հարաբերություններին նվիրված համաժողովի ընթացքում Ուրուգվայի արտգործնախարար Լուիս Ալմագրոն Հարավային անդրադարձել է Արցախի հիմնահարցին։ Այս մասին հաղորդում են Հայ հեղափոխական դաշնակցության (ՀՅԴ) մամլո քարտուղարությունից։

«Այսօր մենք ուսումնասիրում ենք Արցախի հարցը պետականորեն տեսակետ հայտնելու համար։ Ես անձամբ համոզված եմ, որ Արցախը Հայաստանի պատմական մասն է և պետք է լինի անկախ կամ կարճ ժամանակում միանա Հայաստանին: Սա է Արցախյան խնդրի միակ լուծումը»,- ասել է Լուիս Ալմագրոն։