«Լավագույն մարզական ընտանիք 2011» մրցույթի անցկացմանը տրամադրվել էր 69 մլն դրամ

10 սեպտեմբերի 2011 - 13:35 AMT

PanARMENIAN.Net - Սեպտեմբերի 10-ին Ծաղկաձորում տեղի ունեցավ ՀՀ նախագահի մրցանակի համար «Լավագույն մարզական ընտանիք 2011» մրցույթի եզրափակիչ փուլը: Եզրափակիչ էր մտել 103 ընտանիք (324 մարդ):

Միջոցառմանը ներկա էին Հայաստանի նախագահ Սերժ Սարգսյանը, Հայաստանի ազգային Օլիմպիական կոմիտեի նախագահ Գագիկ Ծառուկյանը և սպորտի ու երիտասարդության հարցերի նախարար Արթուր Պետրոսյանը: Իր խոսքում Պետրոսյանը նշեց, որ սպորտի և երիտասարդության նախարարությունը մեծ ուշադրություն է դարձնում մասսայական սպորտին և անում է ամեն ինչ, որպեսզի Հայաստանում սպորտն էլ ավելի զարգանա:

«Օլիմպիական կոմիտեն միշտ էլ զարկ է տվել Օլիմպիական գաղափարների զարգացմանը, և այս մրցույթը նաև նպաստում է, որ միջազգային մրցաշարերում հայ մարզիկները լավ արդյուքներ գրանցեն»,- ասել է Գագիկ Ծառուկյանը, որը պարգևատրել է մրցաշարի ամենափոքրիկ մասնակիցներին:

Եզրափակիչ փուլում 1-3 տեղեր զբաղեցրած ընտանիքները ստացան համապատասխանաբար 500, 400 և 300 հազարական դրամ: Մրցաշարն անցկացվեց 3 տարիքային խմբերում, 1-ին խմբում հաղթել է Գրիգորյանների ընտանիքը ( Երևան) երկրորդում` Ալեքսանյանների ( Շիրակ) և երրորդում` Պողոսյանների (Երևան):

Մրցանակակիրներին պարգևատրեց ՀՀ նախագահը և նշեց, որ այս մրցույթում կարևորը ոչ թե հաղթելն է, այլ այն, որ տարեցտարի առողջ ապրելակերպ նախընտրող ընտանիքների թիվը Հայաստանում աճում է: «Այս միջոցառման նպատակն է, որ Հայաստանում ավելի ամուր ընտանքիներ լինեն, և հույս ունեմ, որ մյուս տարի մասնակից ընտանիքների թիվը կավելանա և ավելի լավ արդյունքներ կգրանցվեն»:

«Լավագույն մարզական ընտանիք» մրցույթն անցկացվեց 8-րդ անգամ, 2010 թվականին մասնակցել է 347 ընտանիք, իսկ 2011-ին` 1122: 2010-ին մրցանակային ֆոնդը կազմել է 23 մլն դրամ, իսկ 2011-ին` 69 մլն դրամ, որից 55-ը կազմել է պարգևատրման ֆոնդը: