Թուրքիայի վարչապետ Ռեջեփ Թայիփ Էրդողանը սեպտեմբերի վերջում Մակեդոնիա կատարած այցի ժամանակ առաջարկել է իր երկրի բյուջեից զգալի նյութական նվիրատվություն հատկացնել Մակեդոնիայի ֆուտբոլի հավաքականին Հայաստանի թիմին հաղթելու համար:

Այդ մասին, հղում անելով իր աղբյուրներին Մակեդոնիայի խորհրդարանում, հայտնում է sovetunion.ru-ն: Ըստ տեղեկատվության, իր առաջարկն Էրդողանն արել է Մակեդոնիայի խորհրդարանի ներկայացուցիչ Տրայկո Վելյանոսի հետ մասնավոր զրույցում: Ինչպես կարծում են փորձագետները, Էրդողանի նման շահագրգռվածությունը նրանում, որ Հայաստանը պարտվի, բացատրվում է նրանով, որ Թուրքիան ցանկանում է խուսափել Հայաստանի արագ տեմպերով աճող հավաքականի հետ հանդիպումից Եվրո-2012 եզրափակչի համար հարակից խաղերում:

Հոկտեմբերի 7-ին Երևանի Վազգեն Սարգսյանի անվան հանրապետական մարզադաշտում Հայաստանի հավաքականը կընդունի Մակեդոնիային: Հայկական թիմը իրական շանս ունի ոչ միայն մասնակցելու եզրափակչի համար հարակից խաղերին, այլ, նաև բարենպաստ պայմանների դեպքում, զբաղեցնել առաջին տեղը B խմբում: Թուրքիայի հավաքականը ևս հավակնում է հարակից խաղերին մասնակցելուն: Թուրքական թիմը 14 միավոր է հավաքել A խմբում և զբաղեցնում է երկրորդ տեղը: