Հայկական պատվիրակությունը ԵԽԽՎ-ին կոչ է արել համագործակցել Ղարաբաղի հետ

6 հոկտեմբերի 2011 - 19:34 AMT

PanARMENIAN.Net - Եվրոպայի Խորհրդի Խորհրդարանական Վեհաժողովի պատգամավորները կառույցին կոչ են անում համագործակցել Լեռնային Ղարաբաղի հետ: Ինչպես հաղորդում է «Ժառանգության» մամլո ծառայությունը, ԵԽԽՎ-ում հայկական պատվիրակությունը հայտարարություն է տարածել, որի տակ ստորագրել են ԵԽԽՎ 32 պատգամավորներ` Ֆրանսիայի, Բելգիայի, Իտալիայի, Ավստրիայի, Նիդեռլանդների, Լյուքսեմբուրգի, Շվեյցարիայի, Մեծ Բրիտանիայի, Սերբիայի, Մալթայի և Անդորրայի: Հայտարարության մեջ, մասնավորապես, ասվում է. «20 տարի առաջ, խորհրդային և միջազգային օրենքների հիման վրա ընդունելով անկախության մասին որոշումները, մեր տարածաշրջանում նոր պետություններ ձևավորվեցին: Ինքնորոշման և Խորհրդային միությունից ապագաղութացման իրավունքն իրականացվեց ոչ միայն Հայաստանի, Ադրբեջանի և Վրաստանի կողմից, այլև` Լեռնային Ղարաբաղի: Այս չորս քաղաքական միավորներն անկախություն հռչակեցին մոտավորապես միաժամանակ: Հայաստանը, Ադրբեջանը և Վրաստանը արդեն 10 տարի է, ինչ Եվրոպայի խորհրդի անդամ են, իսկ Արցախը այս կազմակերպության անդամ չէ: Հակառակ այս փաստի և դժվարին իրավիճակի` Արցախը, այնուամենայնիվ, որդեգրել և շարունակաբար իրականացնում է պետական շինարարության այնպիսի քաղաքական ուղի, որը համապատասխանում է Եվրոպայի խորհրդի ոգուն, առաքելությանը և արժեքներին: Հակառակ այս փաստի և դժվարին իրավիճակի` Արցախը, այնուամենայնիվ, որդեգրել և շարունակաբար իրականացնում է պետական շինարարության այնպիսի քաղաքական ուղի, որը համապատասխանում է Եվրոպայի խորհրդի ոգուն, առաքելությանը և արժեքներին: Բարձր գնահատելով Արցախի որդեգրած` զարգացման ժողովրդավարացման մոդելի արդյունքներն ու շարժընթացը և գիտակցելով Արցախի պաշտոնական ներկայացուցիչների` ԵԱՀԿ Մինսկի խմբի շրջանակներում ընթացող բանակցություններին մասնակցելու անհրաժեշտությունը` մենք շնորհավորում ենք Լեռնային Ղարաբաղի Հանրապետությանը` 20-ամյակի կապակցությամբ, և կոչ ենք անում սերտորեն համագործակցել նրա օրինականորեն ընտրված իշխանությունների հետ»: