ՎԶԵԲ պատվիրակությունը Հայաստանի վարչապետի հետ քննարկել է հետագա համագործակցության ուղիները

PanARMENIAN.Net - Հայաստանի վարչապետ Տիգրան Սարգսյանը հոկտեմբերի 17-ին ընդունել է Վերակառուցման և զարգացման եվրոպական բանկի (ՎԶԵԲ) տնօրենների խորհրդի պատվիրակությանը: Հանդիպմանը մասնակցում էին նաև ՎԶԵԲ-ի տարածաշրջանային (Կովկաս, Մոլդովա և Բելառուս) տնօրեն Պոլ Անրի Ֆորեստիեն և բանկի երևանյան գրասենյակի ղեկավար Վալերիու Ռազլոգը: Պատվիրակությունը Հայաստան է ժամանել` ընթացիկ ծրագրերը քննարկելու, Հայաստանի ներկայիս տնտեսական իրավիճակին ծանոթանալու և մեր երկրի համար նոր ռազմավարության մշակման գործում Եվրոպական բանկի գործունեության առաջնահերթությունները հստակեցնելու նպատակով:

«Այս հանդիպումը լավ հնարավորություն է` քննարկելու, թե ինչ ճանապարհ ենք միասին անցել, և ինչն ավելի կարևոր է` ինչ ճանապարհ պետք է անցնենք»,-վարչապետի խոսքն է մեջբերում Հայաստանի կառավարության մամլո ծառայությունը: Հյուրերի խնդրանքով Տիգրան Սարգսյանը ներկայացրել է Հայաստանի տնտեսության ներկայիս վիճակը՝ նշելով, որ համաշխարհային տնտեսական ճգնաժամը դասերի տվեց Հայաստանին, ուստի իշխանությունների ջանքերն ուղղված են երկրի տնտեսության դիվերսիֆիկացման խթանմանը` ստվերային տնտեսության կրճատման և գործարար միջավայրի բարելավման ուղղությամբ բարեփոխումների իրականացման ճանապարհով: Անդրադառնալով Եվրոպական բանկի հետ Հայաստանի համագործակցության նոր ռազմավարության առաջնահերթություններին` գործադիրի ղեկավարը կարևորել է փոքր և միջին ձեռնարկատիրությանն աջակցության ընդլայնման և տեղեկատվական տեխնոլոգիաների (ՏՏ) ոլորտում Start-up բիզնեսի զարգացման ուղղությամբ ծրագրերի իրագործումը:

ՎԶԵԲ-ի պատվիրակության անդամներն իրենց հերթին շնորհակալություն են հայտնել վարչապետին ընդունելության համար և շնորհավորել Հայաստանի անկախության հռչակման 20-ամյակի կապակցությամբ: Նրանք ընդգծել են Հայաստանում բարեփոխումների իրականացման ներուժի առկայությունը և հաստատել դրա իրացման գործում բանկի կողմից օժանդակություն ցուցաբերելու պատրաստակամությունը: